Kryetari i Prishtinës, Përparim Rama, është takuar me Jeremy Long, zëvendësdrejtorin në Zyrën për Çështjet e Evropës Qendrore në Departamentin e Shtetit, gjatë qëndrimit të tij në SHBA.
Ai ka thënë se kryeqyteti mbetet i hapur për investitorët amerikanë dhe së shpejti do të organizohet një konferencë për të prezantuar mundësitë dhe për të ndërtuar partneritete të reja.
“Diskutuam gjithashtu për potencialin e madh që kanë kompanitë amerikane për të investuar në Prishtinë, sidomos teksa përgatitemi për Lojërat Mesdhetare 2030. Energjetika alternative dhe projektet e mëdha zhvillimore janë fusha kyçe ku partneriteti mund të sjellë ndikim real”, ka shkruar Rama në Facebook.
Ai më tej ka thënë se ka ndarë vizionin për Prishtinën dhe ka treguar për bllokadën financiare.
“Ndava vizionin e Prishtinës për katër vitet e ardhshme dhe theksova vështirësitë serioze me të cilat po përballet Kryeqyteti me Qeverinë Qendrore, veçanërisht bllokimin e vazhdueshëm të buxhetit të qytetit”, ka thënë ai.
