“Makina e parë fluturuese është parë në Rumani”, është një nga komentet humoristike në një video virale që qarkullon në rrjetet sociale këto ditë, ku shihet një shofer pas timonit të një Mercedesi duke fluturuar mbi një rrethrrotullim dhe dy makina që i afrohen.
Pamjet dyshohet se janë filmuar në një rrugë rumune.
Pasi fluturoi mbi makina, Mercedesi, sipas portalit rumun Adevărul , “u ul brutalisht, goditi një gardh dhe u ndal në sipërfaqen e gjelbër të një stacioni benzine aty pranë”.
Sipas mediave lokale, shoferi është një burrë 55-vjeçar i cili mbeti i bllokuar në makinë për disa kohë pas aksidentit, derisa ekipet e shpëtimit e nxorën me sukses.Burri pësoi lëndime të lehta deri të moderuara dhe u dërgua në spital. Sipas Adevărul , ai nuk ishte nën ndikimin e alkoolit ose drogës, dhe aksidenti iu atribua një krize diabetike, e cila e bëri të paaftë të reagonte gjatë drejtimit të automjetit.
