Dialogu Kosovë – Serbi është sërish në fokus për shkak të bllokimit të thelluar dhe mungesës së hapave konkretë.
Normalizimi mbetet një nga kushtet kryesore për Serbinë në rrugën drejt BE-së, ndërsa nga Beogradi kërkohet të mos pengojë anëtarësimin e Kosovës në organizata ndërkombëtare, e nga Prishtina formimi i Asociacionit. Pavarësisht përpjekjeve të ndërmjetësuesve ndërkombëtarë për ta mbajtur procesin aktiv, ekspertët vlerësojnë se dinamika politike në terren tregon nevojën për qasje të reja dhe angazhim më të vendosur.
“Normalizimi është i mundur vetëm nëse ekziston vullnet politik si në Beograd ashtu edhe në Prishtinë. Sot shohim ngecje dhe madje regres. Disa pika të zgjidhura më parë po rihapen, ndërsa marrëveshjet e arritura po relativizohen. Normalizimi nuk mund të kufizohet në nivel institucional,sepse ai shoqëror është shumë më kompleks dhe afatgjatë”, ka thënë Igor Novakoviq nga ISAC Fund.
Ekspertët e integrimeve vlerësojnë se Bashkimi Evropian nuk po shfaq angazhimin e nevojshëm. Takimi i radhës mes liderëve nuk shihet në horizont dhe ritmi i procesit do të varet kryesisht nga BE-ja.
“Çështja kyçe është se sa realisht do të angazhohet BE-ja. Aktualisht fokusi i tyre është te Partneriteti Lindor, veçanërisht Ukraina, ndërsa në Ballkan prioritet mbetet ruajtja e stabilitetit minimal. Prandaj, nuk priten lëvizje të mëdha, por vetëm mbajtja e kornizës ekzistuese”, ka thënë Bojana Sellakoviq nga Konventa Kombëtare për BE.
Sipas ekspertëve, dialogu po vuan nga lodhja e përgjithshme e të gjitha palëve, ndërsa mundësia e progresit mbetet e kufizuar derisa të qartësohen zhvillimet politike të brendshme në të dy vendet.
