Policia e Kosovës ka bërë të ditur se në lumin Lumbardh, në fshatin Grabanicë të Klinës, është gjetur trupi i pajetë i një gruaje që ishte raportuar e zhdukur një natë më parë.
Zëdhënësi i Policisë për rajonin e Pejës, Fadil Gashi, ka deklaruar se rasti është raportuar rreth orës 13:30, kur gruaja është gjetur pa shenja jete rreth një kilometër larg urës së fshatit.
Vdekjen e saj, sipas tij, e ka konfirmuar ekipi mjekësor që ka dalë në vendngjarje.
Trupi i viktimës është dërguar në Institutin e Mjekësisë Ligjore për obduksion, në mënyrë që të përcaktohen rrethanat e vdekjes.
Familjarët e kishin njoftuar Policinë të shtunën mbrëma se gruaja ishte larguar nga shtëpia dhe se nuk kishin asnjë informacion për vendndodhjen e saj.
