Komisioni Qendror i Zgjedhjeve ka miratuar dizajnit dhe përmbajtjes së fletëvotimit të 28 dhjetorit që do të përdoret në vendvotime brenda vendit në zgjedhjet e parakohshme për Kuvendin e Kosovës.
Kryesuesi Kreshnik Radoniqi njoftoi se ndaj këtij vendimi mund të ushtrohet ankesë në Panelin Zgjedhor për Ankesa dhe Parashtresa.
Ankesë në PZAP ka paralajmëruar anëtarja turke e KQZ-së, Mufera Shinik, e cila ka kërkuar që në fletëvotime për komunën e Prizrenit e Mamushës të jetë edhe gjuha turke.
“Ne kemi me dërguar edhe në PZAP ankesën edhe në Gjykatë Supreme, veç mirë është me ditë kush ka pasur ndikim. Nuk dua të them diçka tjetër. Kush ka pasur ndikim të ndryshojnë të drejtat e ligjit e të Kushtetutës që i kemi. Mirë është kjo, prapë po them se është mirë, edhe populli edhe Kosova, edhe komuniteti turk edhe Turqia edhe bota me ditë kush është me kënd”, tha ajo.
Miratimi i dizajnit dhe përmbajtjes së fletëvotimit vjen pas tërheqjes së shortit për renditjen e subjekteve politike në këtë fletëvotim.
Fletëvotimi përmban 24 subjektet politike pjesëmarrëse në këtë proces zgjedhor, prej të cilave, 18 parti politike, 3 koalicione, 2 iniciativa qytetare dhe 1 kandidat i pavarur. Në mbledhjen e kaluar, KQZ ka miratuar fletëvotimin për votimin jashtë Kosovës, i cili është i njëjtë, si në përmbajtje ashtu edhe në dizajn.
Gjithashtu, KQZ-ja mori vendim për miratimin e formulës për përbërjen e Këshillave të Vendvotimeve të rregullta, vendvotimeve me kusht dhe ekipeve të numërimit në Qendrat Komunale të Numërimit për zgjedhjet e parakohshme për Kuvendin e Kosovës, të cilat do të mbahen më 28 dhjetor 2025.
