Policia e Kosovës ka njoftuar se më 9 dhe 10 dhjetor 2025, në Republikën e Kosovës do të qëndrojë për vizitë zyrtare Presidenti i Republikës së Shqipërisë, Bajram Begaj.
Me këtë rast, Policia e Kosovës do të angazhohet me kapacitetet e saj për ruajtjen e rendit dhe qetësisë publike gjatë gjithë kohës së vizitës.
Për të siguruar mbarëvajtjen e lëvizjes sipas itinerarit zyrtar dhe zhvillimin e aktiviteteve të parashikuara në agjendë, Policia e Kosovës do të realizojë ndërprerje të përkohshme të qarkullimit të trafikut, në intervale të shkurtra kohore, në disa segmente rrugore.
Sipas policisë, në disa raste trafiku mund të riorientohet edhe në rrugë alternative.
Policia e Kosovës u bën thirrje qytetarëve dhe pjesëmarrësve në komunikacion për mirëkuptim dhe respektim të udhëzimeve policore, me qëllim të garantimit të sigurisë dhe zhvillimit normal të vizitës zyrtare.
