Agjencia për Informim dhe Privatësi mëton zvogëlimin e barrës administrative. Duke menaxhuar rastet nëpërmjet E-qeverisjes në informim, hapet rruga drejt një sigurie më të madhe, duke eliminuar barrierat burokratike dhe reduktuar stafin administrativ.
Siguria e të dhënave dhe privatësia e qytetarëve, si parime themelore të garantuara nga standardet e avancuara dhe procedurat ligjore, përmes qeverisjes elektronike po e transformojnë mënyrën e komunikimit.
Njohës të fushës theksojnë se, përveç lehtësimit të proceseve dhe ndërtimit të besimit, qeverisja elektronike i hap rrugë një administrate moderne, të përgjegjshme dhe të mbrojtur përmes teknologjisë.
“Isha këtu për të përcjellë këtë platformë që të shikojmë si do të përdoret dhe është me të vërtetë një kënaqësi si institucionet tona po përparojnë si ekspertët tanë po krijojnë platforma të tilla e në fund të fundit kjo nëse kurrgjë tjetër do të jetë ruajtje e parasë publike sepse koha duhet të menaxhohet shumë më mirë e shumë më lehtë” , tha Artan Dërmaku, profesor Universitar.
Realizimi i këtij procesi të rëndësishëm të informimit, rritjes së sigurisë dhe zvogëlimit të procedurave administrative, nga Agjencia për Informim dhe Privatësi dhe GIZ-i gjerman, konsiderohet si një hap i rëndësishëm drejt transformimit të sistemit në një drejtim më të sigurt dhe me perspektivë bashkëkohore.
“Digjitalizimi sot, jo vetëm për agjencinë por gjithë shoqërinë Kosovare, por edhe për te gjitha shoqëritë globale është pjesë e pandashme dhe ne vetëm kështu duhet te mësohemi dhe kështu do te jetojmë”,tha Krenare Sogojeva, Komisionere e Agjencisë për Informim dhe Privatësi.
“Na duhet transparenca, na duhet që informatat të ndahen me të gjithë qytetarët dhe në të njëjtën kohë informata të jetë e qasshme për ata që kanë nevojë të kenë atë informatë ndërsa të mos jetë e disponueshme informata për ata që nuk iu duhet. Këtu angazhohemi ta arrijmë transformim nga sistemi i bazuara në letër në atë të dixhitalizuar”, tha David Oberhuber, Drejtor i GIZ-it.
Investimi i shpejtë në sisteme të sigurta, transparente dhe të orientuara drejt qytetarit e afron vendin me standardet moderne të zhvillimit. Këto u theksuan në konferencën e Agjencisë për Informim dhe Privatësi, mbi zvogëlimin e barrës administrative përmes sistemit të menaxhimit të rasteve të kësaj agjencie.
