22 organizata të shoqërisë civile kanë reaguar ndaj sulmeve dhe denigrimit të gjyqtarëve nga Lëvizja Vetëvendosje.
Reagimi vjen pas postimit në Facebook të Alban Krasniqit, anëtar i Komisionit Qendror të Zgjedhjeve nga Vetëvendosje, i cili ka përdorur gjuhë fyese ndaj gjykatave dhe Panelit Zgjedhor për Ankesa dhe Parashtresa (PZAP).
Krasniqi reagoi pasi Gjykata Supreme refuzoi ankesën e Vetëvendosjes lidhur me votimin nga jashtë vendit. PZAP kishte vendosur që qendrat e votimit jashtë Kosovës të jenë vetëm përfaqësitë diplomatike dhe hapësirat e tyre, duke pranuar ankesën e LDK-së lidhur me vendimin e Komisionit Qendror të Zgjedhjeve.
Në reagimin e tyre, organizatat theksuan se “Krasniqi ka publikuar një status në llogarinë e tij në Facebook, në të cilin fyen dhe denigron gjyqtarët e gjykatave dhe Panelit Zgjedhor për Ankesa dhe Parashtresa (PZAP) me fjalë poshtëruese. Kjo sjellje ka për qëllim të dëmtojë kredibilitetin e sistemit gjyqësor, të nxisë publikun të përdorë diskurs negativ ndaj gjyqtarëve dhe të krijojë klimë armiqësore ndaj tyre”.
Ato i kërkuan kryetarit të Vetëvendosjes, Albin Kurti, të ndërpresë menjëherë sulmet ndaj gjyqësorit dhe institucioneve të tjera.
“Ne kërkojmë nga kryetari i Lëvizjes Vetëvendosje Albin Kurti që menjëherë të ndalojë sulmet ndaj sistemit gjyqësor dhe pushteteve tjera, siç janë mediat dhe organizatat e shoqërisë civile, sa herë që nuk pajtohet me to”, thuhet në reagim.
Organizatat rikujtuan gjithashtu rëndësinë e respektimit të vendimeve gjyqësore sipas standardeve ndërkombëtare.
“Ne u rikujtojmë anëtarëve të Lëvizjes Vetëvendosje, e sidomos atyre që njëkohësisht ushtrojnë funksione publike, se e vetmja formë e kundërshtimit të vendimeve gjyqësore është përmes apelimit të tyre. Një gjë e tillë është e paraparë edhe me Rekomandimin CM/Rec (2010)12 të Këshillit të Europës për gjyqtarët… Ata duhet të shmangin gjithashtu veprimet që mund të vënë në pikëpyetje vullnetin e tyre për të zbatuar vendimet e gjyqtarëve, përveç rasteve kur shprehin qëllimin e tyre për të apeluar vendimin”, theksohet në reagim.
Në përfundim, organizatat theksuan se “sistemi gjyqësor është një shtyllë e fuqishme që mbron demokracinë në vend”.
