Pokrovs
Pokrovsk, një qytet kyç në Ukrainën lindore, ende nuk është në duart e Rusisë, pavarësisht pretendimit të fundit të Vladimir Putinit se është pushtuar. Ukraina pranon se po humbet një pjesë të territorit, por këmbëngul se ende kontrollon veriun e qytetit.
Kujtojmë se më 1 dhjetor, pas një raporti nga Shefi i Shtabit të Përgjithshëm rus Valery Gerasimov drejtuar Presidentit Vladimir Putin, zëdhënësi i Kremlinit Dmitry Peskov deklaroi se “Krasnoarmeysk”, ose “Qyteti i Ushtrisë së Kuqe”, siç e quajnë rusët Pokrovsk sipas zakonit sovjetik, ishte pushtuar.
Në postin komandues ushtarak ukrainas, ushtarët po monitorojnë dronët në kohë reale dhe po drejtojnë sulme ndaj pozicioneve ruse. Për të vërtetuar se ata ende po rezistojnë, anëtarët e regjimentit sulmues Skala ngritën shkurtimisht një flamur ukrainas nga një ndërtesë. “E patë me sytë tuaj”, tha komandanti Yuri , duke thënë se njoftimi rus se qyteti kishte rënë ishte një gënjeshtër, raporton BBC .
Luftimet në Pokrovsk kanë vazhduar për gati 18 muaj, qyteti është në rrënoja dhe forcat ruse po përparojnë ngadalë nga jugu. Komandantët ukrainas pretendojnë se janë ende të pranishëm deri në vijën hekurudhore që ndan qytetin. Sipas tyre, rusët përdorin ekipe të vogla që punojnë nëpër rrënoja, ndonjëherë të maskuar si civilë, por ushtria ukrainase pretendon se i zbulon dhe i neutralizon shpejt ata.
Ushtarët ukrainas e përshkruan situatën si “të vështirë, por nën kontroll”. Ata theksuan se nuk do të tërhiqeshin dhe se dorëzimi i një pjese të territorit ishte i papranueshëm. “Nëse ua japim këtë, do të kërkojnë më shumë”, thotë njëri prej ushtarëve.
Dronët luajnë një rol të madh në luftime. Forcat ukrainase thonë se rusët kanë më shumë avionë me kamera termike, gjë që u jep atyre një avantazh natën. Ushtarët shpresojnë për mjegull dhe shi, të cilat e bëjnë të vështirë fluturimin dhe mbikëqyrjen.
Pavarësisht lodhjes dhe luftimeve të ashpra, ushtarët ukrainas hedhin poshtë pretendimet se qyteti është i rrethuar. Ata thonë se ende e mbajnë Pokrovskun dhe nuk do të dorëzohen pa luftë.
