Ambasada e Gjermanisë në Prishtinë ka publikuar sot një mesazh me rastin e Ditës Ndërkombëtare të të Drejtave të Njeriut, duke theksuar se situata globale e lirive themelore vazhdon të jetë shqetësuese. Sipas njoftimit, 85% e njerëzve në botë jetojnë në vende ku liria e shprehjes dhe e tubimit është e kufizuar, ndërsa tortura raportohet në mbi 140 shtete.
Ambasada vuri në dukje se konfliktet e armatosura vazhdojnë të marrin jetë civilësh, ndërsa diskriminimi përbën kërcënim të madh për gratë, komunitetin LGBTIQ* dhe pakicat e tjera. Po ashtu, miliona njerëz ende përballen me mungesë qasjeje në arsim, shëndetësi dhe mundësi ekonomike.
Në këtë kontekst, Gjermania thekson angazhimin e saj për mbrojtjen e të drejtave të njeriut, si në nivel kombëtar ashtu edhe ndërkombëtar. Si nënshkruese e Konventës së OKB-së kundër Torturës, OPCAT-it dhe konventave evropiane për parandalimin e torturës, Gjermania mbështet mekanizmat monitorues dhe vepron përmes Agjencisë Kombëtare për Parandalimin e Torturës.
Gjithashtu, përmes kontributeve në Fondin Vullnetar të OKB-së për Viktimat e Torturës dhe Fondin Special OPCAT, Gjermania siguron ndihmë direkte për personat e prekur.
Ambasada theksoi se vendi promovon vazhdimisht lirinë e besimit, dialogun, tolerancën dhe edukimin për të drejtat e njeriut, duke mbështetur projektet e shoqërisë civile dhe iniciativat për mbrojtjen e pakicave.
“Jo vetëm në Ditën e të Drejtave të Njeriut, por 365 ditë në vit: dinjiteti njerëzor është angazhim i përditshëm”, thuhet në njoftim.
