Kryetari i Kuvendit të Republikës së Kosovës, Dimal Basha, mori pjesë në hapjen e ekspozitës “E vërteta, kujtesa, drejtësia”, organizuar në ambientet e Kuvendit nga Presidenca e Kosovës.
Kryetari Basha në një shënim të tij vlerësoi se kjo ekspozitë solli sot para syve rrugën e dhimbshme të popullit tonë, nga vuajtjet e të burgosurve politikë deri te mizoritë e luftës së viteve 1998–1999.
Ekspozita, e organizuar nën patronatin e Ppresidentes Osmani, në kuadër të Qendrës Rajonale të Ekselencës për Gratë, Paqen dhe Sigurinë, si dhe në bashkëpunim me Institutin për Krimet e Kryera gjatë Luftës, siç tha kryetari Basha, përmes dokumenteve, materialeve arkivore dhe rrëfimeve të mbledhura me përkushtim, na riktheu te periudha e errët e historisë sonë, ku njerëzit u persekutuan, u torturuan dhe u privuan nga liria vetëm pse kërkonin të jetonin të lirë në vendin e tyre.
“Në këtë ekspozitë pata nderin të jem së bashku me Presidenten Osmani dhe Kryeministrin Kurti. Rikujtuam përgjegjësinë tonë si institucione dhe shoqëri për të ruajtur të vërtetën, për të nderuar viktimat dhe për të mos lejuar që dhimbja e tyre të harrohet. Në kuadër të Ditës Ndërkombëtare të Përkujtimit dhe Dinjitetit të Viktimave të Krimit të Gjenocidit dhe Parandalimit të këtij Krimi, qëndruam para dëshmive të gjenocidit dhe mizorive të kryera gjatë viteve 1998–1999, të cilat na kujtojnë se lufta nuk ishte vetëm histori e përballjes së armatosur, por histori njerëzish të pafajshëm: të burgosur politikë që i paraprinë lirisë sonë, familje të tëra të zhdukura, gra e fëmijë që pësuan dhunë dhe terror vetëm pse ishin shqiptarë. Këto histori janë plagë të hapura, por edhe dëshmi të së vërtetës sonë kolektive”, ka thënë Basha, njofton Kuvendi i Kosovës.
Duke nderuar të gjithë ata që humbën jetën, ata që u flijuan nëpër burgje dhe ata që mbijetuan për të treguar të vërtetën, ka shtuar ai, riafirmohet angazhimi për një të ardhme që ndërtohet mbi kujtesë, drejtësi dhe paqe.
“Sepse mizoritë e së kaluarës nuk guxojnë të përsëriten kurrë, dhe e vërteta jonë nuk guxon të heshtë”, ka theksuar tutje kryeparlamentari Dimal Basha.
