Kryetari i Komunës së Gjilanit, Alban Hyseni, së bashku me anëtarët e rinj të Kuvendit Komunal, kanë dhënë sot betimin në mbledhjen inauguruese, e cila u drejtua nga anëtari më i vjetër, Isa Agushi.
Në hapje të seancës, Agushi theksoi rëndësinë e bashkëpunimit, pavarësisht dallimeve politike.
“Përkundër faktit që ne vijmë nga subjekte të ndryshme politike, misioni ynë i përbashkët është mbrojtja e interesave të komunës së Gjilanit dhe qytetarëve të saj, bazuar në ligjet dhe aktet nënligjore në fuqi”, tha Agushi.
Pas dhënies së betimit, kryetari Hyseni u adresua para kuvendarëve, duke e vlerësuar ditën si një moment reflektimi, përgjegjësie dhe shprese.
“Sot, më shumë sesa një akt formal, jemi para një momenti reflektimi dhe përgjegjësie. Ndjehem krenar sepse qyteti ynë ka qytetarë të mirë, të mençur e punëtorë, që besojnë në institucionet e tyre dhe në të ardhmen”, u shpreh ai.
Hyseni theksoi se Gjilani ka hyrë në një fazë të transformimit të vërtetë, e cila matet jo vetëm me projekte infrastrukturore, por me mundësi të reja për qytetarët.
“Komuna e Gjilanit tashmë ka nisur një transformim që nuk matet vetëm me kilometra apo metra katrorë ndërtimi, por me ndryshimet që sjell në jetën e njerëzve. Bulevardi i ri po bëhet shpirti modern i qytetit; stadiumi është hapësira e krenarisë sportive; projekti FLOWS ka ndikim të madh në përmirësimin e cilësisë së jetës; impianti i ujërave të zeza do të zgjidhë probleme bazike të trashëguara ndër vite; ndërsa banimi i përballueshëm e social do të mbështesë familjet në nevojë dhe ata që kërkojnë një fillim të ri”, tha kryetari.
Ai shtoi se projektet arsimore dhe kulturore janë po ashtu thelbësore për zhvillimin e qytetit.
“Shkolla e mjekësisë, pas 20 vitesh, do të përgatisë brezat e rinj të profesionistëve. Po ashtu, salla e sporteve, qendra e kulturës, stacioni i autobusëve dhe dhjetëra projekte të tjera janë pjesë e vizionit tonë për një Gjilan modern dhe funksional”, u shpreh Hyseni.
