KEK sot ka mirëpritur një delegacion të lartë nga Ministria Federale për Bashkëpunim Ekonomik dhe Zhvillim e Gjermanisë (BMZ), Ambasada Gjermane dhe KfW, të cilët zhvilluan një vizitë zyrtare në lokacionin e parkut solar të projektit strategjik “Solar4Kosovo I – Photovoltaics (100 MW)”.
Delegacioni u mirëprit nga Drejtori Ekzekutiv i Divizionit për Energji të Ripërtëritshme në KEK, Erdoan Zasella, i cili, së bashku me bashkëpunëtorët e menaxhmentit, njoftoi delegacionin me operimet, sfidat dhe objektivat strategjike të Korporatës – me theks të veçantë në diversifikimin e burimeve të energjisë dhe zhvillimin e parkut solar 100 MW, një ndër projektet më të mëdha të energjisë së ripërtëritshme në Kosovë.
“Vizita u kryesua nga Znj. Micong Klimes, e sapoemëruar zyrtare përgjegjëse për Kosovën në BMZ, e cila përfshiu këtë projekt në itinerarin e saj të parë zyrtar në vend. Prania e saj dhe e partnerëve gjermanë nënvizon nivelin e lartë të mbështetjes politike, financiare dhe teknike që i jepet këtij projekti”, thuhet në komunikatën e KEK-ut.
Projekti Solar4Kosovo I (100 MW), i financuar nga Bashkimi Evropian (WBIF), Qeveria Gjermane përmes KfW dhe bashkëfinancuar nga Banka Evropiane e Investimeve (EIB), ka hyrë zyrtarisht në fazën e parë të tenderimit – procesin e përzgjedhjes fillestare (parakualifikimit) për dizajnimin, furnizimin dhe instalimin e impiantit.
“KEK sh.a., së bashku me të gjithë akterët dhe partnerët që po e bëjnë të mundur këtë projekt, nxisin fuqishëm të gjitha kompanitë e kualifikuara, vendore dhe ndërkombëtare, që plotësojnë kriteret të aplikojnë në këtë proces të rëndësishëm, i cili do të zhvillohet me konkurrueshmëri të lartë, transparencë të plotë dhe cilësi të garantuar sipas standardeve evropiane.vNjë projekt kyç për tranzicionin energjetik të Kosovës”, njfton KEK.
“Solar4Kosovo I – Photovoltaics (100 MW)”është projekti më i madh solar i realizuar ndonjëherë në Kosovë dhe përfaqëson një hap të rëndësishëm drejt rritjes së kapaciteteve të energjive të ripërtëritshme, shfrytëzimit të zonave të rehabilituara të deponive të hirit dhe forcimit të sigurisë energjetike të vendit.
