Hetimet njëvjeçare për sulmin në ‘Iber Lepenc’ kanë nxjerrë në pah skenarin e përgatitur me përpikëri nga tre të dyshuarit e nacionalitetit serb. Pas këtij skenari, sipas njohësve të sigurisë, qëndron shteti serb. Në hetimin e rastit mori pjesë edhe FBI, e cila identifikoi 3 të dyshuarit përmes dheut që u gjet në çizmet e tyre. Ndërkaq, njëri nga të akuzuarit dyshohet të jetë agjent i Shërbimit Informativ Ushtarak të Serbisë. RTK ka siguruar aktakuzën e Prokurorisë së Shtetit ndaj tyre.
Rrjedha e qetë e ujit në Zubin Potok u bë skenë e një prej sulmeve më të rënda ndaj sigurisë kombëtare të Republikës. Gjithçka që nisi në heshtje e fshehtësi, mbrapa kishte një skenar, e objektivi ishte i qartë, të goditej infrastruktura kritike e Kosovës. RTK ka siguruar aktakuzën e Prokurorisë Speciale të Kosovës ndaj 3 të akuzuarve te nacionalitetit serb për sulmin në “Ibër Lepenc”.
Autorët e sulmit u identifikuan pasi në hetimin e rastit u përfshi edhe Byroja Federale e Hetimeve të SHBA-së, që ndryshe njihet si FBI. E njëjta kishte kryer analizat e dheut të cilat u gjetën në çizmet e të dyshuarve.
Sulmi u ekzekutua më 29 nëntor të 2024-tës rreth orës 18:50. Të akuzuarit kishin vendosur një sasi të konsiderueshme të eksplozivit në brendësi të kanalit. Eksplozivi ishte vendosur përmes një çante e cila ishte lidhur me litar në shtyllën e betonit. Sipas aktakuzës, eksplozivi i vendosur shërben për përdorim ushtarak. Ndërsa, autorët e kishin vendosur të njëjtin në një vend ku do të shkaktohej dëm serioz i infrastrukturës kritike të furnizimit me ujë dhe rrymë.
Si rrjedhojë, u ndalë furnizimi me ujë të pijshëm për qytetarët, u pengua furnizimi me ujë për KEK-un e i rrezikua prodhimi i rrymës në nivel vendi.
Kryeshefi ekzekutiv i Ibër Lepencit, Faruk Mujka i tha RTK-së se nëse dëmet nuk do të sanoheshin me kohë, pasojat për vendin do të ishin katastrofave.
“Si pasojë e këtij akti kriminal, u dëmtua rëndë pjesa fundore dhe njëra ballinë e akuaduktit, duke rrezikuar seriozisht furnizimin me ujë për të gjithë konsumatorët që shërbehen nga ky sistem. Gjatë gjithë procesit të riparimit, janë ndërmarrë masa të veçanta për të siguruar sasi të mjaftueshme uji për termocentralin ‘Kosova B’, duke parandaluar çdo ndërprerje të mundshme të furnizimit energjetik. Këto masa kanë qenë jetike për ta shmangur një krizë të dyfishtë energjetike dhe ujore”, tha Mujka.
Por me kaq nuk mbeti. Sipas aktakuzës, njëri nga të akuzuarit i cili dyshohet se ka vepruar si agjendë i shërbimit ushtarak informativ serb, kishte vëzhguar edhe lëvizjet e KFOR-it si dhe bazën e njësisë speciale të policisë.
Në Jasenovik të Zubin të Potukut njëri nga të akuzuarit kishte fotografuar bazën e njësive speciale të policisë si dhe kishte vëzhguar e regjistruar lëvizjet e forcave të KFORT-it. Të njëjtat i kishte raportuar në Shërbimin Informativ Ushtarak të Serbisë.
Hetimet zbuluan se brenda shtëpive të të dyshuarve ishin ruajtur armë luftarake, municion, pajisje ushtarake e mjete komunikimi e maskimi.
“Kjo tregon qasjen dhe seriozitetin deri në detajet më të fundit që të arrihet e vërteta e patjetërsuar. Institucionet tona kanë bashkëpunuar konstant me një agjenci që është më kredibile në botë. Këtu është përdorur teknika kriminalistike”, tha Arben Dashevci, njohës i sigurisë.
Të tre të akuzuarit priten të përballen me akuzat për sulm terrorist, teksa J.V i dyshuar si agjent i Serbisë, edhe për spiunazh dhe bashkëpunim me shërbimin ushtarak serb.
