Komisioni Qendror i Zgjedhjeve nuk ka certifikuar kandidatët për deputetë nga Lista Serbe, meqë për certifikimin e 33 emrave në listën e këtij subjekti politik serb votuan vetëm katër anëtarë, 2 ishin kundër e gjashtë të tjerë abstenuan.
Kundër certifikimit të këtyre kandidatëve të Listës Serbëve votuan dy anëtarët nga Vetëvendosje, Sami Kurteshi e Alban Krasniqi.
“Gjitha ato që janë sqaruar edhe më herët, unë dhe kolegu im jemi kundër certifikimit të Listës Serbe, bashkë me kandidatët e tyre”, tha Kurteshi.
Paraprakisht, Besnik Buzhala nga Sekretariati i KQZ-së, tha se lista është verifikuar dhe nga të dhënat rezulton që asnjë kandidat nuk bie ndesh me nenin 30 të Ligjit për Zgjedhjet e Përgjithshme.
Ndërkohë, në pjesën e parë të mbledhjes, KQZ, për pjesëmarrje në zgjedhje, mori vendime të veçanta për certifikimin e kandidatëve për deputetë të 23 subjekteve politike, prej të cilave 17 parti politike, 3 koalicione, 2 iniciativa qytetare dhe 1 kandidati të pavarur. Numri i përgjithshëm i kandidatëve, që përfaqësojnë këto subjekte politike, sipas KQZ-së, është 1,146 kandidatë.
Në këtë mbledhje, KQZ certifikoi vetëm 42 nga 43 kandidatët e koalicionit VAKAT nga radhët e komunitetit boshnjak, për shkak të situatës së padefinuar tërësisht dhe pretendimeve se një nga kandidatet nga kjo listë i përket etnisë shqiptare.
Kryetari Radoniqi kur e hodhi në votim vendimin për certifikimin e kandidatëve të këtij subjekti politik, pa emrin e Ena Krasniqit që bartte numrin gjashtë, tha se ndaj vendimit mund të parashtrohet ankesë në afat prej 48 orësh në Panelin Zgjedhor për Ankesa dhe Parashtresa.
“Sido që të jetë nëse mendoni mundemi me e ndarë listën e kandidatëve, të largohet personi në fjalë, Ena Krasniqi dhe pastaj t’i jepet e drejta për ankesë, dhe le të vendoset në instanca tjera. A po pajtoheni, është një zgjidhje, sepse penalizohet tërë partia që veç është certifikuar”, i pyeti Radoniqi anëtarët aty, të cilët mbështetën propozimin me votë.
