Kryeministri i Kosovës në detyrë, Albin Kurti, ka thënë se Drita ka bërë përfaqësim dinjitoz të shtetit në futbollin evropian.
Ai ka pritur skuadren gjilanase të mërkurën, një ditë para se Drita të ndeshet me AZ Alkmaar në Prishtinë.
“Nga 36 ekipe, FC Drita e Gjilanit renditet në vendin e 8-të në Ligën e Konferencës. Shanset i kanë të mëdha për kualifikim në fazën tjetër. Përfaqësuesve të klubit, trajnerit, futbollistëve dhe stafit teknik, që i mirëprita me kënaqësi në kryeministri, i shpreha mirënjohjen për përfaqësimin dinjitoz të shtetit tonë. Bardh e kaltërtit nga Gjilani nesër mbrëma në stadiumin “Fadil Vokrri” në Prishtinë e presin AZ Alkmaar e Holandës në ndeshjen e radhës. Arritja e rezultatit pozitiv do të shënonte tjetër sukses historik për klubin dhe mbarë futbollin tonë. Forca Drita!”, ka shkruar Kurti.
Edhe te Drita kanë komentuar takimin.
“Sot në zyrën e tij na priti Kryeministri i Republikës së Kosovës, z. Albin Kurti, i cili na përgëzoi për arritjet e klubit tonë në arenën ndërkombëtare. Kjo mbështetje institucionale na motivon të vazhdojmë rrugëtimin tonë drejt sukseseve edhe më të mëdha, duke përfaqësuar me krenari qytetin tonë dhe futbollin kosovar. Faleminderit Kryeministër! FC Drita do të mbetet gjithmonë shtëpia e vlerave dhe suksesit”, ka shkruar faqja e klubit gjilanas.
