Disa aeroporte ruse, përfshirë të katër aeroportet që ndodhen në kryeqytet, u detyruan të pezullojnë operacionet gjatë natës për shkak të një sulmi masiv me dronë nga Ukraina, thanë sot zyrtarë rusë.
Sipas autoritetit të aviacionit “Rosaviatsiya”, mbi 130 fluturime vetëm në Moskë ndryshuan destinacion u vonuan ose u anuluan.
Aeroportet e kryeqytetit ”Sheremetyevo”, ”Domodedovo”, ”Vnukovo” dhe ”Zhukovsky” qëndruan jashtë funksionit për më shumë se shtatë orë.
Ministria ruse e Mbrojtjes njoftoi se pothuajse 300 dronë ukrainas u rrëzuan gjatë natës.
Më shumë se një e treta e tyre u ndërprenë në rajonin perëndimor Bryansk, pranë kufirit me Ukrainën, ndërsa rreth 40 dronë të tjerë u neutralizuan në rajonet Kaluga dhe Moskë.
Ministria nuk dha detaje mbi dëmet e mundshme.
Në rajonin verior të Novgorodit, mediat raportuan se ka shpërthyer një zjarr. Raporte të pakonfirmuara sugjeruan se sulmi mund të ketë pasur në shënjestër një fabrikë që prodhont nitrat amoni, një komponent i përdorur në lëndë shpërthyese.
Kreu i Komitetit Hetimor të Rusisë, Alexander Bastrykin, tha se sulmet me dronë ukrainas kanë shkaktuar dëme të konsiderueshme në 41 rajone, me një kosto totale prej rreth 600 miliardë rublash (7,6 miliardë dollarë) që nga fillimi i luftës në shkurt 2022.
Ai tha se Moska do të kërkojë kompensim nga Kievi.
Rusia vazhdon të lëshojë dronë dhe raketa kundër Ukrainës, ku Kievi vlerëson se dëmet totale nga pushtimi arrijnë në qindra miliarda dollarë./
