Sot u mbajt manifestimi kulturor–shkencor në kuadër të Ditëve të Shën Nënë Terezës, i organizuar nga Misioni Katolik Shqiptar në Kroaci, në ambientet e Dvorana Vijenac, në Zagreb.
Në këtë veprimtari mori pjesë edhe Kryetari i Unionit Esad Çollaku duke dëshmuar mbështetjen dhe angazhimin institucional ndaj aktiviteteve që promovojnë trashëgiminë kulturore dhe historike shqiptare.
Manifestimi u zhvillua në formën e një tribune shkencore, ku u trajtuan tema me rëndësi të veçantë për historinë dhe identitetin shqiptar dhe më gjerë. Në mesin e ligjëruesve ishin personalitete të njohura të klerit dhe studimeve teologjike:
Kurse dom. Lush Gjergji, i cili foli mbi 1700-vjetorin e Koncilit të Nikesë, duke theksuar rëndësinë historike dhe teologjike të këtij koncili për Kishën dhe qytetërimin europian.
Mons. don. Antun Sente, i cili paraqiti mesazhin dhe misionin e Shën Nënë Terezës në botën e sotme, duke vënë në pah aktualitetin e vlerave të saj humane, të dashurisë dhe solidaritetit.
Ndërsa Pater Ndue Kajtazi, i cili mbajti ligjëratën kushtuar 400-vjetorit të lindjes së Pjetër Bogdanit, një prej figurave më të shquara të kulturës, letërsisë dhe mendimit shqiptar.
Ky manifestim shërbeu jo vetëm si një moment reflektimi mbi figura dhe ngjarje kyçe të historisë sonë shpirtërore, por edhe si një urë lidhëse ndërmjet komunitetit shqiptar dhe institucioneve fetare e kulturore në Kroaci, duke forcuar dialogun, kujtesën historike dhe vlerat universale që përfaqëson Shën Nënë Tereza.
