/ATSH/ 100- vjetori i Urdhrit të Skënderbeut u përkujtua pak ditë më parë në një ceremoni të posaçme në Pallatin e Kongreseve, ku u nderuan 24 personalitete me kontribut në fusha të ndryshme.
Kryeministri Edi Rama përcolli sot momente nga kjo ceremoni, ku u nderuan vlerat kombëtare, dhe njerëzit që frymëzojnë të tashmen dhe sendërtojnë të ardhmen e përbashkët europiane.
“Momente vlerësimi nga mbrëmja solemne ‘Urdhri i Skënderbeut’ në qindvjetëshin e tij”, u shpreh Rama.
Në mbrëmjen solemne ku ishin të pranishëm Presidenti i Republikës Bajram Begaj si dhe personalitete të tjera të shquara të fushave të ndryshme, u shfaq fillimisht dokufilmi “Urdhri i Skënderbeut në Qindvjetshin e tij – Rilindja e një shenje dalluese të Shqipërisë Europiane” shoqëruar me parakalimin dhe vendosjen në qendër të skenës të Urdhrave shqiptarë të para një shekulli dhe të këtij shekulli, të prirë nga Gjerdani i nderit të Shqipërisë, i vitit 1925.
Më pas, u zhvillua ceremonia e dekorimit të 22 personaliteteve me të tre urdhërat kombëtarë: Urdhrin Suprem të Shqiponjës, Urdhrin e Skënderbeut dhe Urdhrin e Lisit Akademik.
Dy medaljonët e parë të 100-vjetorit të Urdhrit të Skënderbeut, Kryeministri Edi Rama i shpërndau për Artan Lamen dhe Filip Rrumbullakun, duke ia dorëzuar familjarëve të tyre ndërsa i cilësoi dy shërbyes të papërtuar të reformës kuptimlotë të titujve të nderit.
Ndërsa Presidenti Bajram Begaj dekoroi 22 personalitete të tjerë.
“Urdhri i Skënderbeut” është krijuar më 3 dhjetor 1925. Urdhri më i vjetër kronologjikisht i krijuar nga Ahmet Zogu si shef shteti, i akordohet të gjithë atyre që tregojnë shërbime të çmueshme kundrejt shtetit ose kombit në çdo fushë.
Rangu i Kordonit të Madh me Yll i rezervohet personaliteteve të shquara shqiptare e të huaja, diplomatëve, dhe individëve të veçantë që janë shquar në fusha të ndryshme si një vlerësim merite.
