Autoritetet australiane konfirmojnë: babë e bir autorë të sulmit të përgjakshëm në Sydney.
Policia në Uellsin e Ri Jugor ka konfirmuar se 16 persona, përfshirë një person të armatosur, janë vrarë në një të shtënë në plazhin Bondi të Sidneit. Sulmuesi tjetër është në gjendje kritike. Sulmuesit janë baba e bir.
40 persona u plagosën. Një aktivitet u mbajt në plazhin Bondi për të shënuar ditën e parë të festimit hebraik të Hanukkah. Sulmi u shpall zyrtarisht një incident terrorist.
Autoritetet australiane kanë bërë të ditur detaje të reja lidhur me sulmin e rëndë të armatosur që ndodhi në Sydney, ku mbetën të vrarë 15 persona, përfshirë edhe një fëmijë, ndërsa njëri nga sulmuesit humbi jetën gjatë incidentit, raporton BBC News.
Në një konferencë për media, Kryeministri i Australisë, Anthony Albanese, së bashku me zyrtarë të tjerë shtetërorë, konfirmuan se autorët e sulmit ishin një burrë 50-vjeçar dhe djali i tij 24-vjeçar. Komisioneri i Policisë së Uellsit të Ri Jugor, Mal Lanyon, tha se 50-vjeçari ishte posedues i licencuar i armëve dhe kishte të regjistruara gjashtë armë zjarri, të cilat u gjetën në zonën e Bondi Beach.
Sipas policisë, në vendin e ngjarjes janë gjetur edhe dy mjete shpërthyese të improvizuara aktive, të cilat janë neutralizuar me sukses nga njësitë e specializuara. Gjithashtu, gjatë natës janë bastisur dy prona në periferi të Sydney-t, në Campsie dhe Bonnyrigg, në kuadër të hetimeve.
Komisioneri Lanyon theksoi se aktualisht po hetohen motivet e sulmit dhe se deri më tani nuk ka pasur indikacione se autorët po planifikonin një akt të tillë. Ai nuk ka komentuar raportimet për gjetjen e ndonjë flamuri ekstremist në vendin e ngjarjes.
Si masë sigurie, policia ka dislokuar 328 oficerë shtesë për të ofruar mbrojtje dhe mbështetje për komunitetin hebre në Sydney.
Ndërkohë, kryeministri Albanese është zotuar se do të angazhojë të gjitha resurset e nevojshme për t’iu përgjigjur sulmit dhe ka theksuar se Australia do të veprojë fuqishëm për të “çrrënjosur antisemitizmin” nga shoqëria australiane.
