Presidenti i SHBA-së, Donald Trump, të martën e zgjati ndalimin e hyrjes në vend për qytetarët e disa vendeve të tjera, përfshirë sirianët dhe palestinezët me dokumente udhëtimi të lëshuara nga Autoriteti Palestinez.
Sipas urdhrit të shpallur nga Shtëpia e Bardhë, ndalimi i përgjithshëm tani mbulon edhe qytetarët e Burkina Fasos, Laosit, Malit, Nigerit, Sierra Leones dhe Sudanit të Jugut. Rregullat lejojnë përjashtime, varësisht nga rasti.
Trump e justifikon këtë veprim duke e quajtur të nevojshëm për të mbrojtur qytetarët amerikanë nga kërcënimet ndaj sigurisë kombëtare dhe publike. Administrata e tij i ka akuzuar vendet në fjalë se nuk përmbushin standardet e duhura kur bëhet fjalë për kontrollet e pasaportave, të cilat ka theksuar se mund të paraqesin një rrezik potencial për Shtetet e Bashkuara.
Shqetësime rreth sistemit të dokumentacionit të Sirisë
Kur bëhet fjalë për Sirinë, administrata amerikane njoftoi se ende nuk ka një autoritet qendror për lëshimin e pasaportave ose dokumenteve civile dhe se mungojnë mekanizmat e duhur të verifikimit, dhe gjithashtu vuri në dukje njerëzit që qëndrojnë më gjatë se vizat e tyre.
Kritika ndaj Autoritetit Palestinez
Shtetet e Bashkuara kanë shprehur shqetësim në lidhje me Autoritetin Palestinez (AP), duke shpjeguar se ai nuk ushtron kontroll të mjaftueshëm mbi zonat nën juridiksionin e tij. Sipas dokumentit, organizatat e përcaktuara nga Uashingtoni si grupe terroriste janë ende aktive në Bregun Perëndimor dhe Rripin e Gazës dhe kanë vrarë qytetarë amerikanë.
Urdhri shtoi se lufta në Gaza ka të ngjarë të ketë dëmtuar më tej aftësinë për të verifikuar siç duhet pasaportat. Duke pasur parasysh atë që dokumenti e quan mbikëqyrje të dobët ose joekzistente nga Autoriteti Palestinez, SHBA-të besojnë se mbajtësit e dokumenteve të udhëtimit të lëshuara nga Autoriteti Palestinez aktualisht nuk mund të verifikohen në mënyrë të besueshme ose t’u jepet hyrja në vend.
Politikë e rreptë e vizave
Që prej rikthimit në presidencë në janar, Trump ka zbatuar një politikë të rreptë për imigracionin dhe vizat, si dhe ka shtrënguar një numër rregullash ekzistuese.
Më herët këtë vit, Uashingtoni vendosi një ndalim të përgjithshëm të hyrjes për disa vende, shumica e të cilave mbeten në fuqi.
Midis këtyre vendeve janë Afganistani, Mianmari, Çadi, Republika e Kongos, Guinea Ekuatoriale, Eritrea, Haiti, Irani, Libia, Somalia, Sudani dhe Jemeni. Kufizime graduale zbatohen edhe për vendet e tjera.
