Kandidati për kryeministër nga LDK-ja, Lumir Abdixhiku, ka thënë se Gjakova është një ndër qytetet kyçe për ndryshimin dhe zhvillimin e vendit.
Ai theksoi se me qeverisjen e tij, jeta e qytetarëve do të pësojë ndryshime në të gjitha dimensionet, përfshirë edhe rritjen e pagave për të gjitha kategoritë e shoqërisë.
“Pagat për mësuesit do të rriten”, tha Abdixhiku.
Abdixhiku u zotua gjithashtu për investime në arsim, ndërtimin e objekteve shkollore, në shëndetësi, si dhe për ndërtimin e spitalit të ri në Gjakovë. Ai premtoi mbështetje edhe për të rinjtë dhe të rejat që përfundojnë studimet në Kosovë.
“Kemi paraparë një miliard euro investime në çerdhe dhe mësim gjithëditor. Programi ynë është program i jetës, prandaj kemi propozuar krijimin e një Ministrie të Familjes. Çdo fëmijë i sapolindur do të mbështetet me 200 euro për një vit, ndërsa çiftet e reja do të mbështeten me nga një banesë”, shtoi ai.
Ndërkohë, kryetari i Partisë së Drejtësisë, Ferid Agani, i cili është pjesë e koalicionit me LDK-në, tha se këto dy parti janë të bashkuara mbi vlera kombëtare dhe njerëzore.
“LDK-ja ka qenë dhe do të mbetet rruga më e sigurt drejt NATO-s, BE-së dhe mekanizma evropianë”, tha ai.
Në këtë tubim u tha se Lidhja Demokratike e Kosovës përfaqëson një zgjidhje shprese për të ardhmen dhe mirëqenien e të gjithë qytetarëve të vendit./rtk
