Frikësohet se disa persona kanë vdekur pasi një aeroplan privat Cessna Citation C550 u rrëzua ndërsa po përpiqej të ulej në aeroportin Statesville në shtetin amerikan të Karolinës së Veriut, shkruan Daily Mail.
Aksidenti ndodhi rreth orës 10:15 të mëngjesit sipas orës lokale. Pamjet nga vendi i ngjarjes tregojnë Cessna-n të përfshirë nga flakët pas një përpjekjeje të pasuksesshme për t’u ulur në pistë.
Ekipet e shpëtimit menjëherë shkuan në vendin e aksidentit dhe shërbimet përkatëse nisën një hetim, por ende nuk dihet se sa persona ishin në bord. Aeroplani, i cili vlen maksimumi rreth dy milionë e gjysmë dollarë, mund të mbajë tetë deri në dhjetë persona.
Aeroporti i Statesville konfirmoi se kishte ndodhur një “incident”, por detaje të tjera nuk ishin menjëherë të disponueshme. Dëshmitarët e tragjedisë në një klub golfi aty pranë thanë se Cessna po fluturonte “shumë ulët” përpara se të përpiqej të ulej.
