Aleanca për Ardhmërinë e Kosovës ka vazhduar aktivitetet elektorale në Gjilan. Kandidati i AAK-së për kryeministër Ramush Haradinaj, premtoi investime në infrastrukturë, paga të dinjitetsheme dhe mirëqenie për qytetarët.
“Tri punë na presin: mirëqenia, ekonomia dhe energjia. Nuk duhet të varemi nga energjia e importuar, sepse na thonë se çmimin e cakton tregu. Ne duhet të premtojmë energji, dhe puna e parë që duhet të bëjmë është të prodhojmë çmimin e tregtarëve. Çmimi i energjisë duhet të ulet. Do të aktivizojmë çdo para të Kosovës, të diasporës. Do të aktivizojmë çdo potencial që e ka vendi. Do ta kthejmë paranë e Kosovës dhe do të ndërtojmë partneritete, hua dhe kredi nga jashtë. Do të dyfishojmë pagat”, tha Haradinaj.
Haradinaj premtoi se gjatë qeverisjes së tij do të ketë mbështetje për mjekët, policët e ushtarët, mësimdhënësit e të gjitha shtresave e shoqërisë në vend.
Duke shprehur bindjen se lista e AAK-së është zgjidhja më e mirë, ai tha se zgjedhjet e 28 dhjetorit janë jetike për vendin.
“Ne vërtet çdo herë jemi mundur ta bëjmë listën më të mirë për deputetë, por lista 129 është më e mira që Aleanca ka pasur ndonjëherë. Ka atdhetarë, patriotë, të shquar, dhe të gjithë ata që e përfaqësojnë vendin, menaxherë dhe njerëz që e kanë në zemër përkushtimin për Kosovën. Betimi i tyre për vendin është i sinqertë”, tha Haradinaj.
Në tubim u prezantuan kandidatët për deputetë nga radhët e AAK-së nga Gjilani.
