Votat u bënë disa orë para se Trump t’i drejtohej kombit nga Shtëpia e Bardhë. Fjalimi i rrallë në mbrëmje pritej të përqendrohej në ato që ai i sheh si fitore të mëdha, por mund të përfshijë edhe prioritetet e tij të politikës së jashtme, një ditë pasi ai urdhëroi një “bllokadë” të cisternave të sanksionuara të naftës që largoheshin ose hynin në Venezuelë.
Dhoma e Përfaqësuesve, e dominuar nga republikanët, votoi 216 pro dhe 210 kundër një rezolute të sponsorizuar nga përfaqësuesi Gregory Meeks i Nju Jorkut, demokrati më i lartë në Komitetin e Punëve të Jashtme të Dhomës së Përfaqësuesve, që do të kishte tërhequr forcat e armatosura amerikane nga armiqësitë me “çdo organizatë terroriste të përcaktuar nga presidenti në Hemisferën Perëndimore”, përveç nëse miratohej nga Kongresi.
Dhoma e Përfaqësuesve votoi gjithashtu 213-211 kundër një rezolute të sponsorizuar nga Jim McGovern i Massachusetts, demokrati më i lartë në Komitetin e Rregullave të Dhomës së Përfaqësuesve, që do t’i kishte urdhëruar presidentit të tërhiqte forcat amerikane nga armiqësitë me ose kundër Venezuelës pa miratimin e Kongresit.
Të dyja votat ishin pothuajse ekskluzivisht sipas vijave partiake. Dy republikanë votuan me demokratët për rezolutën e parë dhe tre mbështetën të dytën. Dy demokratë e kundërshtuan rezolutën e parë dhe njëri votoi kundër tjetrës.
Trupat amerikane kanë kryer më shumë se 20 sulme ndaj anijeve të kontrabandës së drogës në Karaibe dhe Paqësor që nga fillimi i shtatorit, duke vrarë më shumë se 80 persona, ndërsa Trump rrit një grumbullim ushtarak kundër qeverisë së Presidentit Venezuelan Nicolas Maduro.
Administrata e Donald Trump po shqyrton mundësitë për të goditur atë që e quan rol të Maduros në furnizimin me drogë të paligjshme. Presidenti i Venezuelës ka mohuar të ketë të bëjë me tregtinë e paligjshme të drogës.
Ligjvënësit amerikanë i kanë akuzuar prej kohësh presidentët nga të dyja partitë se përpiqen të anashkalojnë kërkesën e Kushtetutës së SHBA-së që Kongresi, jo presidenti, duhet të autorizojë të gjitha veprimet ushtarake përveç atyre afatshkurtra.
Anëtarët e Kongresit janë përpjekur vazhdimisht ta detyrojnë Trumpin të kërkojë miratimin e Kongresit për fushatën kundër Venezuelës që kur ajo filloi në fillim të shtatorit.
Megjithatë, çdo përpjekje u mposht nga kundërshtimi i republikanëve të Trump, të cilët mbajnë shumicë të ngushtë si në Dhomën e Përfaqësuesve ashtu edhe në Senat.
Duke folur kundër rezolutave, përfaqësuesi Brian Mast i Floridës, kryetar i Komitetit të Punëve të Jashtme të Dhomës së Përfaqësuesve, i quajti ato një dredhi “për të penguar Presidentin Trump të mbrojë SHBA-në kundër terroristëve të caktuar të karteleve”.
Përfaqësuesi Thomas Massie i Kentucky-t, një nga të paktët republikanë që votuan pro rezolutave, tha se autoriteti për të shpallur luftë nuk duhet të jetë në duart e një njeriu të vetëm.
“Nëse presidenti beson se veprimi ushtarak kundër Venezuelës është i justifikuar dhe i nevojshëm, ai duhet ta paraqesë çështjen dhe Kongresi duhet të votojë”, tha Massie në një fjalim në sallën e Dhomës së Përfaqësuesve.
Sipas ligjit amerikan, Trump ka të drejtë të fillojë veprime ushtarake që do të zgjasin deri në 60 ditë, me 30 ditë shtesë për t’u tërhequr.
