Në Prishtinë, Nisma Socialdemokrate ka hapur zyrtarisht fushatën për zgjedhjet e 28 dhjetorit. Kandidati për kryeministër nga kjo parti politike, Fatmir Limaj tha se po shkojnë drejt zgjedhjeve me një kauzë të madhe për bashkim e ndryshim. Ndërsa u prezantuan edhe 110 kandidatët për deputetë të Kuvendit të Kosovës.
Nisma Socialdemokrate ka hapur zyrtarisht fushatën në Prishtinë për zgjedhjet e 28 dhjetorit, nga ku ka kërkuar mbështetje për kandidatin e saj për kryeministër, Fatmir Limaj.
Limaj tha se po vinë me një kauzë të madhe për bashkim e ndryshim për republikën.
“Shpresa jeton aty ku është guximi. Vendi zhvillohet aty ku guximi dhe shpresa bëhen bashkë. Ata që kanë me shkua e me votua numrin 122 e kanë në zemër edhe guximin dhe i japin shpresë jetës për ndryshim. A ka kauzë më të madhe e njerëzore sesa kauza për bashkim, shpresë e ndryshim”, tha Fatmir Limaj, kandidat për kryeministër nga Nisma.
Limaj tutje u shpreh se nuk janë vetëm fjalë, por që bashkë me ekipin e tij do të punojnë për realizimin e kërkesave të qytetarëve.
“Qytetarët e Kosovës e kanë mundësinë që të rreshtohen rreth veprave, angazhimeve, rreth atyre që kanë ndryshuar jetën e tyre. Angazhimi për Kosovën nuk është thjeshtë për të qenë deputetë. Ne i kemi shërbyer Kosovës. Kur Kosova ka pas nevojë nuk ka pas nevojë ne me na thirr. Ne kemi qenë aty për t’i dal zot. Edhe sot jemi të gatshëm për t’i dal zot pa kushte. Ne ndihemi krenarë me çdo pjesë të atdheut”, tha Fatmir Limaj, kandidat për kryeministër nga Nisma.
Nisma prezantoi edhe 110 kandidatët për deputetë të Kuvendit të Kosovës./rtk
