Kryeministri i Shqipërisë, Edi Rama, ka vizituar në Hagë ish-presidentin e Kosovës, Hashim Thaçi, i cili po mbahet në paraburgim nga Dhomat e Specializuara.
Pas vizitës, Rama ka reaguar publikisht duke shprehur kritika të ashpra ndaj procesit gjyqësor, të cilin e ka cilësuar si të padrejtë dhe të papranueshëm. Ai ka deklaruar se Hashim Thaçi është larguar nga detyra e presidentit dhe është dërguar në paraburgim pa gjyq dhe pa aktakuzë të konfirmuar në momentin e arrestimit, duke e quajtur këtë një “teatër të turpit të drejtësisë ndërkombëtare”.
Rama ka theksuar se procesi ndaj ish-krerëve të Ushtrisë Çlirimtare të Kosovës nuk mund ta njollosë luftën çlirimtare të popullit të Kosovës, duke shtuar se akuzat e ngritura, të cilat kanë origjinë nga raporti për trafik organesh, “nga kukullat ruse të Dumës së Putinit në Strasburg dhe e vazhduar me lloj-lloj absurditetesh e dëshmitarësh groteskë të akuzës ndërkombëtare në Hagë”.
Duke folur për takimin, kryeministri shqiptar ka thënë se Thaçin e ka gjetur në gjendje të mirë shpirtërore, të qetë dhe të vendosur, pavarësisht, sipas tij, kufizimeve të pajustifikueshme të të drejtave themelore, të cilat janë shtuar krahasuar me vizitat e mëparshme.
“E kam gjetur komandantin në formë, të qetë e të buzëqeshur si çdo i pafajshëm me karakter të hekurt…”, ka shkruar Rama.
Sipas tij, gjatë takimit kanë biseduar për familjen, miqtë e përbashkët, Shqipërinë dhe Kosovën, si dhe për libra dhe leximet që Thaçi po i ndjek gjatë qëndrimit në paraburgim, të cilin ish-presidenti i Kosovës, sipas Ramës, e quan me ironi “institut”.
Kryeministri i Shqipërisë e ka cilësuar ndalimin e gjatë të Thaçit dhe të të akuzuarve të tjerë si një padrejtësi të rëndë në zemër të Evropës demokratike, duke theksuar se kjo situatë po ndodh me mbështetjen e vendeve evropiane dhe të Shteteve të Bashkuara, si dhe me fonde të taksapaguesve evropianë dhe amerikanë.
Në përfundim të reagimit të tij, Rama ka shprehur mbështetje për Republikën e Kosovës, Ushtrinë Çlirimtare të Kosovës dhe ish-krerët e saj që po mbahen në paraburgim prej më shumë se pesë vjetësh.
