Premiera e filmit dokumentar “Izi – Ëndrra vazhdon”, me producent Orhan Kerkezi, i kushtohet të ndjerit Izet Gjinovci, njërit ndër personalitetet më të shquara të hendbollit dhe sportit kosovar në përgjithësi. Premiera mbahet sot, duke filluar nga ora 18:00, në Kino ABC në Prishtinë.
Dokumentari paraqet jetën, veprën dhe kontributin e jashtëzakonshëm të Gjinovcit për sportin kosovar. Është një rrëfim frymëzues që ruan kujtimin për të ndjerin dhe përcjell atë te brezat e ardhshëm.
Izet Gjinovci vdiq më 5 gusht të vitit të kaluar në moshën 63-vjeçare. Ai e kreu punën e sekretarit të përgjithshëm të Federatës së Hendbollit të Kosovës nga viti 2002 e deri në frymën e fundit.
Ishte pjesë vendimtare e proceseve të rëndësishme për hendbollin kosovar, si pranimi i kushtëzuar e më pas i plotë në EHF e IHF.
