Kryetari i Aleancës për Ardhmërinë e Kosovës, Ramush Haradinaj, ka vlerësuar si “lajmin më të mirë të ditës” rikonfirmimin e politikës amerikane ndaj Kosovës dhe Ballkanit Perëndimor, përmes Ligjit për Autorizimin e Mbrojtjes Kombëtare (NDAA), i cili tashmë ka hyrë në fuqi.
Sipas Haradinajt, ky ligj refuzon qartë çdo ide për ndarje, shkëmbim territoresh apo ndryshim kufijsh mbi baza etnike, duke forcuar mbështetjen për integritetin territorial të shteteve të rajonit.
Ai theksoi se ligji mbështet perspektivën e anëtarësimit të Kosovës në NATO, si dhe të gjithë Ballkanit Perëndimor, duke e cilësuar anëtarësimin në NATO si themel të sigurisë dhe zhvillimit të Kosovës si shtet dhe shoqëri.
Haradinaj nënvizoi se ligji përcakton qartë edhe politikën amerikane për zbatimin e Marrëveshjes për Normalizimin e Marrëdhënieve Kosovë–Serbi, me qëllim final njohjen reciproke.
Po ashtu, ai tha se përmes këtij ligji rikonfirmohet mbështetja e SHBA-së për demokracitë në Ballkanin Perëndimor, duke paralajmëruar se çdo zyrtar i lartë që vepron kundër integritetit territorial të shteteve, cenon rendin demokratik, shkel të drejtat e njeriut apo përfshihet në afera korruptive, do të përballet me sanksione.
Në fund, Haradinaj theksoi se miqësia dhe partneriteti me Shtetet e Bashkuara të Amerikës kanë qenë jetike në të gjitha fazat për Kosovën, përfshirë synimin për anëtarësim në NATO dhe Bashkimin Evropian, që sipas tij përbën edhe thelbin e programit të Aleancës për Ardhmërinë e Kosovës.
Ai shprehu mirënjohje të përhershme ndaj Shteteve të Bashkuara të Amerikës për mbështetjen ndaj Kosovës.
