Kryetari i Aleancës për Ardhmërinë e Kosovës dhe njëherësh kandidat i këtij subjekti politik për kryeministër, Ramush Haradinaj, para simpatizantëve të kësaj partie në Ferizaj foli për rëndësinë e aleancës me Shtetet e Bashkuara, me theks të veçantë në fushën e sigurisë. Ai deklaroi se anëtarësimi në NATO është pjesë e programit të tij.
“Bondsteel ka qenë shpresa jonë e sigurisë së përjetshme. Kur janë vendosë amerikanët ka qenë lajm i madh, jo vetëm që na ka sjellë siguri por edhe jetë e zhvillim, sa e sa njerëz janë punësuar e kanë ndërtuar jetën. Është krejt e logjikshme që ne jemi përcaktuar herët që të jetë një bazë e përjetshme, që ta kemi një siguri të përjetshme, por falë një përcaktimi tonë i marrim pastaj edhe përcaktimin e aleatëve. Është ngjarja më e madhe e mundshme ligji për autorizimin në mbrojtje kombëtare i nënshkruar nga presidenti Trump ku përfshihet Kosova e theksohen qartë disa qëndrime për të cilat edhe ne jemi angazhuar vazhdimisht. Kosova është e paprekshme, tërësia territoriale”, tha Haradinaj.
Kreu i AAK-së, deklaroi se janë përcaktuar për anëtarësim në NATO, dhe, sipas tij, kjo çështje do të përfundojë brenda mandatit, nëse arrin të bëhet kryeministër.
“NATO po, por kur, varet shumë kush jemi, kush e udhëheqë këtë vend dhe a di këtë temë kaq të rëndësishme ta kryejë në kohë më të shkurtër, në komunikim më direkt dhe me efekte më të shpejta për sigurinë tonë. Unë besoj shumë që do t’ia arrijmë bashkë. Këtë e kam të shkruar e të elaburuar në programin tonë. Kjo punë kryhet”, tha Haradinaj.
Ai premtoi edhe zhvillim ekonomik, rritje të mirëqenies së qytetarëve, dhe investime në energji elektrike dhe infrastrukturë.
“E para është paraja e Kosovës të qarkullojë në ekonominë tonë. Çdo para që e ka Kosova, qytetarët tanë, diaspora është mirë t’iu lehtësohet investimi, qarkullimi, gjenerimi në vend. Ne na duhet të marrim çdo para që i dedikohet Kosovës prej partnerëve tanë, dhe nuk është vogël ajo para. Në procesin e anëtarësimit në NATO e BE ekzistojnë fondet për këto vende. Ne na duhet t gjenerojmë paranë tonë. Duhet t’i rrisim të hyrat dhe e kemi paraparë, janë të kalkuluara rritja e pagave dhe shtesave me dyfishim. Nuk kemi qare si Kosovë pa prodhuar edhe më shumë energji në Kosovë, në mënyrë që t’ia shesim qytetarit tonë me çmim të Kosovës”, deklaroi Haradinaj.
Gazsjellësi amerikan dhe një prej Shqipërisë dhe shkëmbimi i rrymës me Shqipërinë pa pagesë si dhe zhvillimi i Kosovës e përmirësimi i jetës të të gjithë qytetarëve e vende të reja të punës, ishin disa premtime të tjera të AAK-së në Ferizaj.
Aleanca për Ardhmërinë e Kosovës në këtë tubim elektoral, prezantoi edhe shtatë kandidatët për deputetë nga kjo komunë.
