Kandidati i Partisë Demokratike të Kosovës për kryeministër në zgjedhjet e 28 dhjetorit, Bedri Hamza pas Pejës është ndalur në Klinë, në takimin e radhës elektoral me mbështetësit e këtij subjekti politik.
Duke marrë si shkas mungesën e energjisë elektrike kandidati ai premtoi se nëse merr mandatin e kryeministrit do të ulë TVSH-në për energji elektrike.
Hamza në Klinë para përkrahësve, u zotua se do t’i përmbushë premtimet nga programi i PDK-së. Përveç rritjes së pagave 50 përqind dhe pensioneve, Hamza premtoi mbështetje të veçantë për kategoritë e dala nga lufta.
“Gjithmonë flas me respekt deri në përulje për kategoritë e dala nga lufta. Po, do të rriten pensionet për familjet e dëshmorëve 50 përqind. Për më tepër sepse unë e di se gjithandej Kosovës se ka familje kanë dhënë më shumë se një dëshmorë. Nuk është ekuivalente kjo në raport me çfarë kanë dhënë këto familje për vendin, për liri e pavarësi, por është një kujdes minimal i shtetit në raport me kontributin e këtyre familjeve”, tha Hamza.
Ai në Klinë simpatizantëve u tha se PDK ka programin më të mirë, derisa premtoi edhe barna falas për të moshuarit, arsim më cilësorë dhe shëndetësi moderne.
Hamza premtoi forcim të sistemit të drejtësisë, arsim më cilësor, partneritet për paqe, si pikë kyçe anëtarësimi në NATO, marrja e statusit të vendit kandidat për anëtarësim në BE e premtime tjera, për siç tha jetë më të mirë të qytetarëve të vendit.
Kandidati i PDK-së për kryeministër kërkoi mbështetje nga mërgimtarët, pasi sipas tij mbështetja e diasporës nuk i ka munguar asnjëherë Kosovës. Në tubimin elektoral në Klinë u prezantuan edhe kandidatët për deputetë nga kjo parti.
