Pas ankesave të qytetarëve të pranuara përmes Qendrës së Komunikimit në Policinë Rajonale të Ferizajt, policia e trafikut ka ndaluar dhe ndëshkuar dy kamionë transportues me targa të huaja, të angazhuar nga kompani private.
Sipas policisë, shoferët e autorizuar ishin të ngarkuar me transportimin e dheut, por nuk kishin kryer pastrimin e gomave të automjeteve para hyrjes në rrugë të asfaltuar. Si pasojë, rruga magjistrale Ferizaj–Kaçanik, në fshatin Komogllavë, është ndotur në tri lokacione të ndryshme.
Në bazë të Ligjit Nr. 08/L-186 për Rregullat e Trafikut Rrugor, neni 41, paragrafi 3, ndaj kompanive përgjegjëse është shqiptuar nga një gjobë në vlerë prej 1,000 euro për ndotje të ambientit.
Policia Rajonale e Ferizajt apelon tek qytetarët dhe punonjësit e kompanive ndërtimore që gjatë kryerjes së punimeve të tregojnë kujdes të shtuar. Sipas ligjit, shoferëve u ndalohet hyrja nga rrugët dytësore të pashtruara në rrugë të asfaltuara pa larguar baltën apo materialet e tjera ndotëse nga rrotat e automjeteve.
