Lidhja Demokratike e Kosovës ka shpalosur programin e saj qeverisës në Ferizaj, ku kandidati për kryeministër, Lumir Abdixhiku, ka prezantuar zotimet kryesore për zhvillim ekonomik, arsim gjithëditor, si dhe rritje të pagave dhe pensioneve.
Gjatë tubimit elektoral, Abdixhiku u premtoi qytetarëve të Ferizajt investime në ekonomi dhe arsim, duke theksuar se arsimi do të jetë një nga shtyllat kryesore të qeverisjes së ardhshme. Ai njoftoi se programi i LDK-së parasheh investim prej një miliard eurosh për çerdhe dhe mësim gjithëditor, me qëllim që fëmijët të kenë kushte më të mira dhe të barabarta me bashkëmoshatarët e tyre në vendet evropiane.
Abdixhiku premtoi gjithashtu rritje të ndjeshme të pensioneve, duke deklaruar se ato do të dyfishohen, nga 150 në 300 euro, ndërsa për shërbime të tjera sociale, sipas tij, do të kujdeset Republika e Kosovës.
Në kuadër të programit ekonomik, ai paralajmëroi rritje të pagave në sektorin publik, duke thënë se paga mesatare do të arrijë deri në 1.000 euro në muaj. Sipas tij, paga e infermierëve do të rritet në 750 euro, ndërsa ajo e mjekëve në 1.200 euro. Po ashtu, Abdixhiku theksoi rëndësinë e trajnimeve për të rinjtë, veçanërisht në fushën e digjitalizimit, si mbështetje për sektorin privat.
Kandidati për kryeministër i LDK-së u ndal edhe te projekti energjetik për ndërtimin e centralit me gaz në Ferizaj, duke e cilësuar atë si një ndër projektet më të mëdha strategjike, me vlerë rreth gjysmë miliardi euro, që sipas tij do të ndikojë drejtpërdrejt në zhvillimin ekonomik dhe energjetik të vendit.
Në fund të tubimit, Abdixhiku kërkoi mbështetjen e qytetarëve edhe për kandidatët për deputetë të Lidhjes Demokratike të Kosovës që garojnë nga Ferizaj.
