Lëvizja Vetëvendosje ka vazhduar sot fushatën zgjedhore në komunën e Pejës, ku kandidati për kryeministër, Albin Kurti, ka shpalosur programin e tij qeverisës, duke premtuar investime në infrastrukturë rrugore, shëndetësi, banim social dhe zhvillim ekonomik.
Gjatë tubimit me simpatizantë, Kurti premtoi përfundimin e magjistrales së Dukagjinit, ndërtimin e rrugës Deçan–Plavë dhe finalizimin e rrugës Dollc–Gjakovë. Ai theksoi se këto projekte do të përmirësojnë ndërlidhjen e rajonit dhe do të ndikojnë drejtpërdrejt në zhvillimin ekonomik të zonës.
Kurti u zotua gjithashtu për zgjerimin e shërbimeve shëndetësore në Pejë, përfshirë hapjen e një poliklinike specialistike, duke theksuar se shëndeti publik mbetet prioritet dhe nuk do të privatizohet. Po ashtu, ai paralajmëroi ndërtimin e sistemit të ngrohjes qendrore me energji termike.
Në kuadër të politikave sociale, kandidati i Vetëvendosjes premtoi ndërtimin e çerdheve të reja, mbështetje për gratë dhe studentët, si dhe banim të përballueshëm dhe social. Ai përmendi edhe investime në trajtimin e ujërave të zeza dhe masa për rikthimin e popullsisë në këtë komunë.
Kurti foli edhe për zhvillimin ekonomik dhe turizmin në Pejë, duke theksuar mbështetjen për zejtarët, ndërtimin e muzeut të qytetit dhe zhvillimin e turizmit shëndetësor, malor dhe agroturizmit, si dhe forcimin e bujqësisë lokale.
Në nivel qendror, Kurti premtoi investime prej një miliard eurosh për ushtrinë e Kosovës dhe një miliard euro për prodhimtarinë, si dhe pensionim të parakohshëm për pjesëtarët e Policisë së Kosovës, përshpejtim të gradimeve dhe krijimin e rezervave vullnetare të Forcës së Sigurisë së Kosovës.
Në fund të tubimit, Kurti ftoi qytetarët e Pejës që të angazhohen në fushatë deri në ditën e zgjedhjeve dhe t’i japin mbështetje Lëvizjes Vetëvendosje.
