Me afrimin e festave të fundvitit, mijëra mërgimtarë nga vende të ndryshme të botës nisen drejt atdheut për festat e fundvitit. Si çdo vit, edhe këtë radhë vërehet fluks i madh i automjeteve, por që gjatë ditës së sotme nuk ka pasur pritje të gjata në kufij. Megjithatë, sipas autoriteteve kufitare, pritjet më të gjata mund të ndodhin gjatë ditëve në vijim, për shkak të rritjes së numrit të bashkatdhetarëve që vijnë në vendlindje.
Por ardhja e mërgimtarëve për festat e fundvitit po shoqërohet edhe me pritje të gjata nëpër pikat kufitare. Megjithatë, pritjet e tyre gjatë mëngjesit të se hënës ishin më të pakta dhe situata ishte më e qetë.
Sipas Qendrës Kombëtare për Menaxhimin Kufitar, pritjet për të hyrë në Kosovë nga pika kufitare në Merdarë janë disa minuta.
Edhe pse thonë se përballen me lodhje dhe pritje, mërgimtarët shprehen se kthimi në atdhe për festat ka një rëndësi të veçantë për ta.
Përveç festave, thonë se do ta shfrytëzojnë edhe të drejtën për të votuar.
Sipas të dhënave nga autoritetet kufitare, pritjet në disa pika kufitare gjatë ditëve të fundit kanë shkuar disa orë.
Sidoqoftë, pritjet e bashkatdhetarëve do të vazhdojnë edhe në ditët në vijim, për shkak të rritjes së numrit të tyre që po hyjnë në vend.
Ministri në detyrë i Punëve të Brendshme, Xhelal Sveçla, njoftoi se ka zhvilluar një bisedë me homologun e tij kroat, Davor Bozhinoviq, lidhur me pritjet e gjata në pikat kufitare gjatë ardhjes së mërgatës në Kosovë.
Sipas Sveçlës, kjo bisedë erdhi pas informatave të pranuara nga bashkatdhetarët për vështirësitë dhe vonesat në kufij. Ai theksoi se ministri Bozhinoviq ka shprehur gatishmëri dhe angazhim që, brenda rregullave ekzistuese, të ndërmerren masa për një kalim kufitar sa më të lehtë dhe më të shpejtë për qytetarët e Kosovës.
Përveç linjave tokësore, mërgata po vjen edhe përmes Aeroportit Ndërkombëtar të Prishtinës. Sipas zyrtarëve nga ky aeroport, nga data 15–21 dhjetor, numri i udhëtarëve të cilët kanë hyrë dhe dale përmes aeroportit është gjithsej 89.913 pasagjerë.
Destinacionet kryesore të fluturimeve të cilat prin gjatë kësaj periudhë janë Zvicra dhe Gjermania. Në total numri i fluturimeve të realizuar është 317 fluturime, që sipas tyre, përbën një rritje prej 6.8% krahasuar me të njëjtën periudhë të vitit të kaluar.
