Kryeministri në detyrë i Republikës së Kosovës, Albin Kurti, ka shprehur ngushëllimet e tij me rastin e ndarjes nga jeta të Shemsi Krasniqit – Shemit, një prej zërave më të njohur dhe më përfaqësues të muzikës shqiptare.
Në ngushëllimin e tij, Kurti vlerëson figurën artistike të Shemit si një zë që “ka hyrë në shtëpitë tona pa trokitur”, duke theksuar rolin e tij si vokalist i grupit “Ilirët”, i cili, sipas tij, i dha fytyrë një etape të rëndësishme të muzikës shqiptare dhe krijoi ndjenjë bashkimi mes shqiptarëve, edhe në kohë ndarjesh e largësish.
“Me interpretimin e tij, kënga u bë kujtesë dhe kujtesa u bë këngë; “Xhamadani vija-vija” u dëgjua e u këndua si shenjë identiteti dhe bashkimi për shqiptarët kudo. Në këto çaste, e kuptojmë edhe më shumë se sa rrallë lindin zëra që nuk janë vetëm art, por janë gjuhë e përbashkët emocioni shpirtëror”, ka shkruar Kurti.
Kryeministri u ka shprehur ngushëllimet më të sinqerta familjes Krasniqi, miqve, bashkëpunëtorëve dhe gjithë publikut që e deshi dhe e vlerësoi Shemin, duke theksuar se humbja e një artisti të tillë është pikëllim mbarëkombëtar.
Ai ka bërë thirrje që vepra dhe kujtimi i Shemsi Krasniqit të nderohen me respekt, duke u mbajtur gjallë përmes mirënjohjes dhe këngëve që do të vazhdojnë të jetojnë në zemrat e njerëzve.
“Disa zëra nuk mbarojnë me një lajm”, përfundon Kurti, “ata vazhdojnë sa herë që një këngë ngrihet si flamur në zemër”.
