Pas rikthimit të Listës Serbe në pushtetin lokal në katër komunat e veriut të Kosovës, të banuara kryesisht nga pakica serbe, kanë filluar t’i zhbëjnë vendimet që janë marrë gjatë mandateve të kryetarëve shqiptarë. Ditë më parë Mitrovica e Veriut, Leposaviqi, Zveçani dhe Zubin-Potoku anë marrë vendim që të tërhiqen nga Asociacioni i Komunave të Kosovës, gjë që kundërshtohet nga kuvendarët komunalë shqiptarë.
Ministri në detyrë i Pushtetit Lokal, Elbert Krasniqi, ka nënvizuar se ky vendim i koordinuar i katër komunave veriore, është i kundërligjshëm, ndërkohë që përtej aspektit procedural, Lista Serbe po dëshmon synimin për të nxitur ndasi dhe tensione ndërmjet bashkësive.
Katër komunat veriore të vendit, të udhëhequra nga Lista Serbe, ditë më parë kanë hedhur në votim idenë për t’u tërhequr nga Asociacioni i Komunave të Kosovës. Për vendimet e marra në sinkron, nga udhëheqësit e Mitrovicës së Veriut, Leposaviqit, Zveçanit dhe Zubin-Potokut, ministria e Pushtetit Lokal, nënvizon se janë të jashtëligjshme.
Elbert Krasniqi, ministër në detyrë i MAPL-së thotë se vendimet e marra mbi pikat e propozuara në këtë mënyrë konsiderohen të kundërligjshme dhe vënë në pikëpyetje ligjshmërinë e tyre. ”Përtej aspektit procedural, Lista Serbe po dëshmon synimin për të nxitur ndasi dhe tensione ndërmjet komuniteteve”, shtonë ai.
Ligji për Vetëqeverisjen Lokale, nënvizon Krasniqi, parasheh që vetëm asamblistët mund të kërkojnë shtimin e pikave në rendin e ditës dhe vetëm për çështje urgjente, ndërsa kjo e drejtë nuk i takon kryetarit të komunës. E asamblistët shqiptarë të kuvendit komunal të Mitrovicës së Veriut e kanë kundërshtuar këtë vendim duke nënvizuar se si komunë e kanë vendin në kuadër të asociacionit të Komunave të Kosovës.
“Në seancën e Kuvendit të Komunës së Mitrovicës së Veriut, kryetari i komunës ka parashtruar një kërkesë për daljen e komunës sonë nga AKK gjë që ka bërë shkelje të ligjit dhe të çdo rregulloreje të kuvendit komunal. Këto kërkesa ju drejtohen kuvendarëve, duhet të bëhen me shkrim, të ketë arsyetimin mbi të dhe të na dërgohen shumë më herët. Me këtë rast është shkel kushtetuta e Republikës së Kosovës, është shkelur ligji për vetëqeverisje lokale dhe gjithashtu rregullorja e Kuvendit Komunal të Mitrovicës së Veriut”, thotë Aida Doli, asambleiste e VV-së.
Sipas saj ky vendim do të kthehet në pikën zero.
“Sa i përket vendimit, ky është vetëm një vendim do të thotë nuk është ende në fuqi. Çdo vendim që merret në Kuvendin Komunal shkon në interpretim në ministri dhe roli jonë por edhe roli i tyre është thjeshtë që mund ta marrin një vendim, por ai vendim do të shkon në interpretim në instance tjera”, thotë Emir Azemi, asambleist i PDK-së.
Ndërkohë, kryetari i Asociacionit të Komunave të Kosovës, Sazan Ibrahimi, ka nënvizuar se nuk do ta shqyrtojë këtë vendim në kuvendin e saj të ardhshëm, duke vënë në pah se tani procesi do të administrohet nga Ministria e Pushtetit Lokal. Katër komunat me shumicë serbe janë udhëhequr nga kryetarë shqiptarë në periudhën midis majit të 2023-s dhe tetor të 2025-s, ndërsa anëtarësimi i tyre në Asociacionin e Komunave të Kosovës është bërë gjatë kësaj periudhe kohore.
Autoritetet qendrore paralajmërojnë se respektimi i procedurave ligjore është kusht për funksionimin demokratik të pushtetit lokal, ndërsa çështja pritet të trajtohet nga institucionet gjegjëse.
