Rusia kreu një sulm masiv me dronë dhe raketa në të gjithë Ukrainën gjatë natës, konfirmoi Presidenti Volodymyr Zelensky, duke thënë se në sulme u përdorën më shumë se 600 dronë dhe më shumë se 30 raketa. Të paktën tre persona u vranë në sulme, përfshirë një fëmijë katërvjeçar, raporton BBC.
Zelensky: Bota nuk po ushtron presion të mjaftueshëm mbi Rusinë
Zelensky tha se sulmet ruse kishin në shënjestër sistemin energjetik, infrastrukturën civile dhe, siç tha ai, “në thelb të gjithë infrastrukturën e jetës së përditshme”. Ai shtoi se paralajmërimet ajrore janë ende në fuqi në pjesën më të madhe të vendit dhe se të gjitha shërbimet e emergjencës janë të angazhuara në rehabilitimin e pasojave të sulmit.
“Sulmet pak para Krishtlindjeve, kur njerëzit thjesht duan të jenë me familjet e tyre, në shtëpi dhe të sigurt, dërgojnë një mesazh jashtëzakonisht të qartë në lidhje me prioritetet e Rusisë”, tha Zelensky. “Putini ende nuk e kupton se duhet të ndalojë së vrarësh. Dhe kjo do të thotë që bota nuk po ushtron presion të mjaftueshëm mbi Rusinë”, tha udhëheqësi ukrainas, i cili po kërkon sanksione më të ashpra ndaj Rusisë dhe ndihmë më të madhe për Kievin nga aleatët perëndimorë.
Sipas autoriteteve ukrainase, një fëmijë katërvjeçar vdiq në rajonin e Zhytomyr, ku u dërgua në spital pas një sulmi ajror rus, por mjekët nuk mundën t’i shpëtonin jetën. Pesë persona të tjerë u plagosën, tha kreu i administratës rajonale, Vitaly Bunechko.
Më parë u konfirmua se një grua 76-vjeçare u vra në rajonin e Kievit, pranë Vyshhorod, pasi një predhë goditi një shtëpi, ndërsa tre persona, përfshirë një 16-vjeçar, u plagosën. Në Khmelnytskyi, në perëndim të vendit, një burrë 72-vjeçar u vra dhe u raportuan edhe ndërprerje të energjisë elektrike.
Polonia ngriti aeroplanët
Operatori i rrjetit elektrik ukrainas Ukrenergo ka njoftuar se janë futur reduktime emergjente të energjisë në disa rajone. Ministria e Energjisë njoftoi se puna për rivendosjen e furnizimit me energji elektrike do të fillojë sapo situata e sigurisë ta lejojë. Ndërprerjet e energjisë elektrike vijnë në një kohë kur temperaturat po i afrohen zeros dhe në Kiev priten minus në ditët në vijim.
Sulmet kanë shkaktuar reagime edhe në fqinjësi. Polonia ka ngritur në ajër avionë luftarakë dhe ka vënë në gatishmëri sistemet e mbrojtjes ajrore për të mbrojtur hapësirën e saj ajrore, diçka që Varshava e bën rregullisht gjatë sulmeve të mëdha ruse në Ukrainë.
Zelensky kishte paralajmëruar më parë se ishte “në natyrën e Rusisë” të kryente sulme të mëdha gjatë festave të Krishtlindjeve, veçanërisht më 23, 24 dhe 25 dhjetor. Vitin e kaluar, Rusia kreu një sulm të fuqishëm me raketa dhe dronë ndaj infrastrukturës energjetike të Ukrainës në Ditën e Krishtlindjeve, të cilin Zelensky e përshkroi në atë kohë si një “zgjedhje të vetëdijshme”.
Deri në vitin 2023, Ukraina festonte Krishtlindjet më 7 janar sipas kalendarit Julian, i cili përdoret edhe nga Rusia, por që nga viti i kaluar, Krishtlindjet në Ukrainë festohen më 25 dhjetor.
