Kompania japoneze e energjisë Tokyo Electric Power (TEPKO) planifikon të rifillojë pjesërisht termocentralin bërthamor Kashiwazaki-Kariwa, më të madhin në botë, më 20 janar, tha presidenti i kompanisë Tomiyaki Kobayakawa.Tomiyaki Kobayakawa deklaroi gjithashtu se njësia e parë e termocentralit do të rifillojë në atë datë, pasi asambleja e Prefekturës Niigata, ku ndodhet termocentrali, miratoi një rifillim të pjesshëm këtë javë.
Do të jetë rinisja e parë e një centrali bërthamor në pronësi të TEPKO-s që nga aksidenti i Fukushima Daiichi në vitin 2011.
Termocentrali Kashiwazaki-Kariwa, i vendosur rreth 220 kilometra në veriperëndim të Tokios, ishte midis 54 reaktorëve japonezë që u mbyllën pas tërmetit dhe cunamit, i cili u konsiderua aksidenti më i keq bërthamor që nga Çernobili.
“Si kompania përgjegjëse për aksidentin e Fukushima Daiichi, ne do të zbatojmë mësimet e nxjerra dhe do të vazhdojmë me rinisjen, e para në 14 vjet, me sigurinë si përparësinë tonë absolute”, tha Kobayakawa.
Japonia deri më tani ka rinisur 14 nga 33 reaktorët e saj operativë, duke kërkuar të zvogëlojë varësinë e saj nga lëndët djegëse fosile të importuara.
Në nëntor, qeveria propozoi gjithashtu një sistem kredish publike si pjesë e një plani për të dyfishuar pjesën e energjisë bërthamore në përzierjen energjetike të vendit.
Kapaciteti total i instaluar i termocentralit Kashiwazaki-Kariva është 8.2 gigavat, që është i mjaftueshëm për të furnizuar disa milion familje.
Rinisja e ardhshme do të mundësojë funksionimin e një njësie prej 1.36 gigavatësh në janar, ndërsa rinisja e një njësie të dytë me të njëjtin kapacitet është planifikuar rreth vitit 2030.
TEPKO tha se disa nga pesë njësitë e mbetura mund të mbyllen përgjithmonë.
