Kandidati i Partisë Demokratike të Kosovës për kryeministër, Bedri Hamza në tubim me simpatizantët e kësaj partie në komunën e Kaçanikut teksa tha se kjo komunë është kështjellë e përbashkimit të PDK-së e Kosovës, u shpreh i bindur në fitore me mbështetjen e qytetarëve edhe të kësaj ane. Atyre u premtoi zhvillim ekonomik e investime kapitale.
“Sa i përket Kaçanikut, me Partinë Demokratike të Kosovës nuk do të ketë mundësi që Kaçaniku t’i ketë për katër vjet zero investime, zero projekte. Asnjë investim s’ka ndodhë në mandatin e kësaj qeverie. Qytetarët e Kaçanikut nuk do të jenë të diskriminuar, do të ketë investime. Impianti për trajtimin e ujërave të zeza, fabrika për trajtimin e ujit të pijes dhe do të zgjidhet problemi për ujë të pijes. Stadiumi në Kaçanik dhe shumë projekte të tjera nga niveli qendror”, premtoi Hamza.
Infrastrukturë të duhur ligjore, e lehtësira për biznese, premtoi Hamza po ashtu në Kaçanik.
Krahas rritjes së buxhetit e fuqizimit të ekonomisë, Hamza u zotua për rritje pagash e pensionesh prej 50 për qind.
“Ky nuk është veç premtim, ky është zotim, garanci. Nëse kjo nuk ndodhë në fillim të mandatit, ju garantoj se fundi i vitit nuk më gjen në zyrë të kryeministrit”, tha ai.
Mbështetje për nëna, fëmijë, nxënës, studentë e të rinj, 30 milionë fond për bursa për studentë, rritje pagash e pensionesh, spital të ri, barna falas për pacientë sidomos për të sëmurët me sëmundje kronike, drejtësi të pa ndikuar nga politika, më shumë prokuror, më shumë gjyqtar, anëtarësim në NATO, Këshill të Evropës e Bashkim Evropian, ishin premtimet tjera të Hamzës në Kaçanik.
Veç tjerash, vota e kaçanikasve nga PDK-ja u kërkua edhe për siç thanë, për t’i pritur në pranverë ish krerët e UÇK-së e PDK-së, me këtë parti në qeveri.
Në fund, Hamza falënderoi dhe uroi bashkatdhetarët, të cilët, sipas tij vetëm vitin e kaluar lanë në Kosovë mbi 1 miliardë e 300 milionë euro.
