Lëvizja Vetëvendosje ka mbajtur të enjten tubim elektoral në Gjilan, në kuadër të fushatës për zgjedhjet e 28 dhjetorit, për çka u ka kërkua mbështetja banorëve të kësaj komune.
Nën brohoritjet e qytetarëve “Mos lëshoni pe”, kandidati për kryeministër i Vetëvendosjes, Albin Kurti, tha se po marshojnë drejt fitores së madhe më 28 dhjetor.
Kurti u zotua për investime në mbrojtje, shëndetësi, arsim , bujqësi e mirëqenie sociale dhe fusha të tjera.
“Fushata jonë udhëhiqet nga dy sllogane, një njërën anë themi siguri dhe begati, sepse siguria është edhe mundësia edhe garancia për begati, por gjithashtu edhe begatia është edhe dobia edhe kuptimi i sigurisë. Për më shumë siguri e për më shumë begati themi mos lësho pe. Qeverisja jonë gjatë këtyre gati 5 viteve i ka pasur 5 çështje, kategori e fushëveprimtari kryesore, të cilat na kanë bërë qeverisjen padyshim më të mbarë e më të mirë në Kosovën e pasluftës. Nënat, fëmijët, veriu, bujqësia, ushtria. Pse ka qenë e mundshme të bëjmë këtë investim të madh në ushtrinë e Republikës dhe për shtresa në nevojë, meqenëse është rritur ekonomia. Rritja ekonomike ka qenë mesatarisht 6 për qind në vit. Dhe bruto produkti vendor është 11 miliardë, vitin e ardhshëm bëhet 12 miliardë”, deklaroi Kurti.
Ai u premtoi banorëve të Gjilanit ndërtimin e çerdheve të reja, si dhe investime në spital i cili krahas gjilanasve do t’u shërbejë, siç tha Kurti, edhe vëllezërve nga Presheva dhe Bujanoci.
Tutje, ai bëri të ditur se tashmë në këtë komunë kanë investuar mbi gjysmë milioni euro për qendrën e transfuzionit. Në këtë tubim Kurti foli për sigurimin e ujit të pijshëm përmes digave ku ndër 5 digat që priten të ndërtohen, njëra prej tyre parashihet të zgjidhë problemin e ujit të pijes për këtë komunë.
“Do ta transformojmë repartin e kirurgjisë dhe gjinekologjisë, emergjencës dhe intensivës dhe do ta ndërtojmë një aneks të ri për radiologji me aparatura të reja e bashkëkohore. Do të jetë qendër spitalore për pacientë nga rajoni i Anamoravës dhe shqiptarëve motrave e vëllezërve tanë nga Presheva, Medvegja e Bujanovci si dhe atyre nga Kumanova. Në Gjilan do ta kemi edhe fokusin tonë për të siguruar ujë të pijshëm përmes digës së Firajës në Shtërpcë. Do t’i bashkëngjitet edhe ky rezervuar që të ketë ujë për bujqësi dhe amvisëri”, deklaroi Kurti.
Gjatë tubimit u tha se Vetëvendosje ia ka kthyer Gjilanit vëmendjen që i takon.
