Organizata e Veteranëve të Luftës së Ushtrisë Çlirimtare të Kosovës i ka përcjellë mesazhin e ngushëllimit nga ish-krerët e UÇK-së, familjes Mustafa për humbjen e babait të Salih Mustafës.
“Të nderuar qytetarë, sapo kemi pranuar një telefonatë nga Haga, nga bashkëluftëtarët tanë që po mbahen atje, të cilët na kërkuan që përmes nesh, si OVL UÇK, t’i përcjellim ngushëllimet e tyre për familjen Mustafa. Në emër të Hashim Thaçit, Kadri Veselit, Rexhep Selimit, Jakup Krasniqit, Salih Mustafës, Pjetër Shalës, Fadil Fazliut dhe Bashkim Smakajt si dhe në emër të Organizatës së Veteranëve të Luftës së UÇK-së, i shprehim ngushëllimet tona më të sinqerta familjes Mustafa, për humbjen e më të dashurit të tyre”, thotë OVL e UÇK-së.
Dhomat e Specializuara i kishin refuzuar vizitën humanitare, Salih Mustafës i cili kishte kërkuar ta vizitonte babanë e tij në gjendje të rënduar shëndetësore.
Salih Mustafa është i dënuar me aktgjykim të formës së prerë, prandaj OVL e UÇK-së në reagimin e tyre thonë se nuk ekziston asnjë rrezik për ndikim në dëshmitarë apo në proces gjyqësor.
Refuzimin e kërkesës, OVL e UÇK-së e quajti të pakuptimtë, johumane dhe në kundërshtim me parimet themelore të të drejtave të njeriut.
