Nga ora 7:00 e mëngjesit të sotëm deri në orën 19:00 të mbrëmjes, sipas kohës lokale, në përfaqësitë e ndryshme diplomatike mërgimtarët tanë kanë votuar për zgjedhjet e parakohshme parlamentare. Për procesin e votimit në 40 vendvotime, që u përkasin 16 ambasadave dhe 13 konsullatave të Kosovës në 18 shtete, nuk janë raportuar parregullsi. Nga gjithsej 19 mijë e 187 shtetas të Kosovës të regjistruar, deri pak pas mesditës rreth 40 për qind nga ta kanë votuar.
Procesi i votimit për zgjedhjet e parakohshme për Kuvendin e Kosovës është zhvilluar sot në përfaqësitë diplomatike të vendit në botë.
Nga ora 07:00 e mëngjesit deri në orën 19:00 të mbrëmjes, sipas kohës lokale, votimi është mbajtur në 29 përfaqësi diplomatike, të shpërndara në 18 shtete të ndryshme, me gjithsej 40 vendvotime.
Komisioni Qendror i Zgjedhjeve, përgjatë konferencave të ditës, ka raportuar se për të votuar në përfaqësi diplomatike janë regjistruar gjithsej 19.187 votues, nga gjithsej mbi dy milionë qytetarët me të drejtë vote në këto zgjedhje.
Valmir Elezi tha në një konferencë për media se deri në orën 13:00 kanë votuar rreth shtatë mijë persona, apo 36.89 për qind e atyre që janë regjistruar. Gjithsej numri i diasporës që është regjistruar për të votuar në këto zgjedhje, përfshirë edhe votimin me postë është pak mbi 77 mijë.
Autoritetet zgjedhore nënvizojnë se nuk janë evidentuar parregullsi përgjatë procesit të votimit.
Ndërkohë, ritheksohet se askush që është regjistruar për të votuar nga diaspora nuk do të mund të votojë fizikisht në Kosovë nesër, kur hapen kutitë e votimit në vend, pasi emrat e tyre janë tërhequr nga listat votuese në vend.
Sipas kohës lokale në Kosovë, në orën 19:00 janë mbyllur qendrat e votimit në Gjermani, Zvicër, Francë, Belgjikë, Norvegji, Austri, Suedi, Slloveni, Danimarkë, Itali, Kroaci, Holandë, Republikën Çeke dhe Hungari.
Ndërkohë, në orën 20:00 votimi do të përfundojë në Ambasadën e Kosovës në Londër, e në orën 1 pas mesnatës, gjithnjë sipas kohës lokale në vendin tonë, procesi i votimit do të përfundojë në 4 përfaqësitë diplomatike në Shtetet e Bashkuara të Amerikës dhe Kanada.
