Kryetari i Komunës së Prishtinës, Përparim Rama, e ka vlerësuar kryetarin e Lidhjes Demokratike të Kosovës, Lumir Abdixhiku, si një shembull të lidershipit të përgjegjshëm dhe etik në një moment sfidues për demokracinë dhe kulturën politike në vend.
Reagimi i tij vjen pas rezultatit të dobët të këtij subjekti politik në zgjedhjet e djeshme të parakohshme parlamentare, e për çka përgjegjësinë e mori kreu i kësaj partie.
Në një postim në rrjetin social Facebook, Rama thekson se Abdixhiku ka udhëhequr një proces të thellë reformues brenda LDK-së, duke e orientuar partinë drejt standardeve programore, profesionale dhe morale që, sipas tij, i shërbejnë interesit publik dhe jo kalkulimeve afatshkurtra politike.
“Investimi në një program substancial dhe në një ekip përfaqësues e kompetent është dëshmi se politika duhet të ndërtohet mbi ide, vlera dhe kapacitete reale”, ka shkruar Rama, duke vënë në pah qasjen programore të liderit të LDK-së.
Ai ka vlerësuar gjithashtu refuzimin e Abdixhikut për t’u bërë pjesë e një diskursi fyes dhe përçarës në politikë.
“Lumiri, me vetëdije të plotë politike, refuzoi të bëhet pjesë e diskursit fyes dhe përçarës që ka dëmtuar për vite me radhë kulturën politike në vend. Ai refuzoi nënçmimin e kundërshtarëve politikë, duke zgjedhur maturinë, respektin institucional dhe gjuhën e përgjegjshme si mjete të konkurrencës demokratike. Kjo qasje nuk është shenjë dobësie, por shprehje e një lidershipi të sigurt në vlera dhe të përkushtuar ndaj standardeve demokratike”, ka theksuar Rama.
Sipas tij, Abdixhiku ka treguar përgjegjësi edhe në proceset me interes kombëtar, duke shmangur populizmin dhe duke dëshmuar gatishmëri për llogaridhënie dhe marrje të vendimeve të vështira.
Rama ka thënë se Abdixhiku vizionin e tij e dëshmoi edhe përmes zgjedhjes së njerëzve jashtë partisë për t’u shërbyer qytetarëve, duke përfshirë edhe kandidimin e tij për kryetar të kryeqytetit, e që sipas tij, ky është tregues se përgatitja profesionale, integriteti dhe kompetenca janë mbi ngjyrat politike.
“Ky është një standard që e afron politikën me shtetin e jo me interesin e ngushtë partiak dhe është për t’u marr shembull”, ka shtuar Rama.
Në postimin e tij, Rama ka vlerësuar edhe mënyrën se si Abdixhiku e ka pranuar rezultatin zgjedhor, duke theksuar se kjo tregon respekt për rregullat demokratike dhe për vullnetin e qytetarëve.
“Me dinjitet institucional e udhëhoqi procesin dhe me po aq dinjitet mbrëmë e pranoi rezultatin, duke treguar respekt për rregullat demokratike dhe për vullnetin e qytetarëve.
Kjo qasje dëshmon vizionin, pjekurinë dhe progresin e tij si politikan. Ky është modeli i lidershipit që ndërton dhe që bashkon shoqërinë, dhe që i duhet vendit edhe në të ardhmen”, ka përfunduar Rama.
