Më shumë se 350 anëtarë të dyshuar të grupit të Shtetit Islamik (ISIS) janë ndaluar si pjesë e operacioneve policore mbarëkombëtare në Turqi.
Ministri i Brendshëm Ali Yerlikaya tha se 357 të dyshuar u arrestuan në 21 provinca në bastisje të koordinuara të martën në mëngjes. Kjo vjen vetëm një ditë pasi tre oficerë policie dhe gjashtë militantë të dyshuar u vranë gjatë një rrethimi tetë-orësh në qytetin veriperëndimor të Yalovës.
Tetë oficerë të tjerë policie dhe një anëtar i forcës së sigurisë u plagosën. Bastisjet në adresa në Stamboll dhe dy provinca të tjera, ku u arrestuan 110 persona, sipas zyrës së prokurorit panë oficerët të sekuestrojnë dokumente dhe materiale dixhitale, ndërsa fotografitë në mediat lokale treguan gjithashtu një numër armësh, duke përfshirë thika dhe plumba.
Një deklaratë nga zyra e kryeprokurorit të Stambollit tha se inteligjenca kishte sugjeruar që të dyshuarit mund të tentonin një sulm në Ditën e Vitit të Ri. Funeralet e tre zyrtarëve të vrarë në Yalova u mbajtën të martën. Presidenti Rexhep Tajip Erdogan u shprehu ngushëllimet e tij familjeve të tyre.
Më parë këtë muaj, autoritetet kryen bastisje masive dhe arrestuan 115 persona. Zyrtarët thanë se mbështetësit e ISIS kishin planifikuar në mënyrë aktive sulme në të gjithë Turqinë, veçanërisht kundër jo-muslimanëve në Krishtlindje dhe Ditën e Vitit të Ri. Shërbimet e sigurisë së Turqisë shënjestrojnë rregullisht njerëz me lidhje të dyshuara me ISIS.
Vendi ndan një kufi prej 900 km me Sirinë, ku grupi vazhdon të veprojë në disa pjesë të vendit. Presidenti i Sirisë Ahmed al-Sharaa, i cili ka lidhje të ngushta me qeverinë turke, është zotuar të punojë me SHBA-në dhe Evropën për të çrrënjosur elementët mbijetues të ISIS derisa SHBA-të nisën një valë sulmesh ajrore kundër pozicioneve të grupit në të gjithë Sirinë të premten në përgjigje të vrasjes së tre amerikanëve.
