Komisioni Qendror i Zgjedhjeve ka njoftuar se deri më tani janë numëruar më shumë se 73 për qind e fletëvotimeve. Pas përfundimit të numërimit të votave me postë, pritet të fillojë edhe numërimi i votave me kusht dhe i votave të personave me aftësi të kufizuara.
Në javën e dytë pas zgjedhjeve të jashtëzakonshme të 28 dhjetorit, Komisioni Qendror i Zgjedhjeve ka bërë të ditur se procesi i numërimit të fletëvotimeve të ardhura me postë po shkon drejt përfundimit, pasi janë numëruar gati 80 për qind e tyre, përkatësisht 75 nga gjithsej 92 kuti votimi të tërhequra nga votimet jashtë Kosovës.
Zëdhënësi i KQZ-së, Valmir Elezi, i ka thënë Radio Kosovës se fletëvotimet e numëruara deri më tani janë ato që janë tërhequr nga dy kutitë postare në Bernë dhe Berlin më 30 dhjetor, si dhe rreth 8 mijë fletëvotime të tjera të tërhequra më 2 janar. “Procesi i tërheqjes së pakove me fletëvotime nga kutitë postare do të përmbyllet sot, më 5 janar”, ka thënë Elezi.
“Pas kësaj do të mund ta dimë se sa nga rreth 58 mijë votuesit e regjistruar për të votuar përmes postës e kanë ushtruar këtë të drejtë”, ka shtuar ai.
Ndërkohë, vëzhgues të procesit zgjedhor vlerësojnë se certifikimi i rezultateve pritet të bëhet në javën e tretë të këtij muaji, përkatësisht deri më 19 janar.
Hulumtuesi i lartë në Institutin Demokratik të Kosovës, Vullnet Bugaqku, i tha Radio Kosovës se afati i certifikimit të rezultateve varet edhe nga ankesat.
“Besoj se certifikimi i rezultateve pritet të bëhet në javën e tretë të muajit janar. Megjithatë, kjo varet edhe nga ankesat dhe procedurat që mund të zhvillohen në Panelin Zgjedhor për Ankesa dhe Parashtresa”, tha Bugaqku.
Sipas tij, mund të ndodhë gjithashtu që disa nga vendimet e PZAP-së të sfidohen në Gjykatën Supreme, gjë që mund ta vonojë procesin. “Këto janë afate strikte dhe ligjore, të cilat duhet të përmbyllen”, theksoi ai.
Tutje, Bugaqku e ka lavdëruar procesin e jashtëzakonshëm zgjedhor të 28 dhjetorit, duke thënë se KQZ-ja ka treguar efikasitet të lartë krahasuar me zgjedhjet e kaluara të 9 shkurtit.
“Krahasuar me zgjedhjet e 9 shkurtit të vitit të kaluar, këtë herë KQZ-ja po e kryen punën me më shumë efikasitet dhe brenda afateve optimale, prandaj edhe nuk ka ankesa nga partitë politike apo kandidatët”, shtoi ai.
Pas përfundimit të numërimit të votave me postë, gjatë kësaj jave do të vazhdojë numërimi i fletëvotimeve nga votimi me kusht, si dhe i fletëvotimeve të personave me nevoja të veçanta. Sipas të dhënave preliminare, nga 57 vendvotime me kusht në 38 komuna të vendit, në sistem janë evidentuar mbi 9,900 votues të regjistruar për të votuar me kusht. Ndërkaq, numri i votuesve të regjistruar në programin e votimit të personave me nevoja të veçanta ka qenë 2,860.
