Me kolona të gjata ishte rruga drejt Drenicës. Si shkak i reshjeve të vazhdueshme të shiut, ngasësit hasën vështirësi në qarkullim në magjistralen Prishtinë-Pejë.
Gjendja me vërshime në Drenas veçse ishte shqetësuese, por meqë reshjet nuk u ndalën, situata u përkeqësua.
Rruga që të dërgon në Drenas, nga Pokleku, konkretisht në lagjen Cërvadiku, ishte totalisht e bllokuar, andaj banorët dhe qytetarët që duhej të kalonin andej detyroheshin të ktheheshin dhe të gjenin alternativa të tjera.
Kishte edhe prej atyre që rrezikonin për të kaluar rrugën në ato kushte të vështira.
Në gjendje të keqe e të pakalueshme ishte një pjesë në Poklek të Ri.
Nga vërshimet u prekën edhe bizneset përreth.
Edhe banorë të kësaj rrethine folën për gjendjen e krijuar dhe vështirësitë në lëvizje.
Vështirë e kalueshme ishte edhe rruga kryesore në Drenas. Pa u prekur nga uji, nuk mbeti as nënstacioni në Drenas, ku si shkak i kësaj pati ndërprerje të energjisë elektrike.
Gjatë gjithë ditës, ekipet e zjarrfikësve qëndruan aty për të ndihmuar dhe për të evakuuar banorët që ishin të rrezikuar.
Aty ishte edhe kryetari i Komunës së Drenasit, e më pas erdhi edhe ministri në detyrë i Infrastrukturës.
Vërshime pati edhe në Skenderaj. Përmes një postimi në rrjetet sociale, kryetari Sami Lushtaku njoftoi se situata e krijuar nga vërshimet në komunën e Skenderajt po menaxhohet me angazhim të plotë nga ekipet në terren.
Ai shtoi se që nga orët e para, zjarrfikësit, shërbimet publike, policia dhe institucionet përkatëse janë duke punuar pa ndërprerë për të parandaluar dëme dhe për të garantuar sigurinë e qytetarëve, derisa theksoi se në këtë komunë gjendja është nën kontroll.
