Zyrtarët e Shërbimit Amerikan të Imigracionit dhe Doganave (ICE) në Minneapolis të Minesotës qëlluan dhe vranë një grua që u përpoq t’u bllokonte rrugën me makinën e saj.
Departamenti Amerikan i Sigurisë Kombëtare konfirmoi se një grua ishte qëlluar me armë. Departamenti deklaroi se oficerët e ICE-së po kryenin “operacione të synuara” kur protestuesit “filluan të prishnin operacionet e tyre” dhe njëri prej tyre “e përdori automjetin e saj si armë”, duke u përpjekur të shtypte oficerët. Oficerja e ICE-së u përgjigj duke “qëlluar në mbrojtje”, shtoi departamenti.
Sekretarja e Sigurisë Kombëtare, Kristi Noem, e quajti incidentin “një akt terrorizmi të brendshëm”. Ajo tha se oficerët e ICE-së që po kryenin një “operacion të zbatimit të ligjit” mbetën të bllokuar në dëborë për shkak të kushteve të këqija të motit dhe po përpiqeshin ta shtynin automjetin e tyre jashtë kur gruaja i sulmoi ata dhe ata përreth tyre, duke u përpjekur t’i shtypte dhe t’i përplaste me forcë.
Kryetari i bashkisë së Minneapolis, Jacob Frey, konfirmoi dijeninë e tij për të shtënat ku përfshihej një agjent i ICE-së dhe kërkoi që agjencia të largohej menjëherë nga qyteti, duke thënë se prania e saj po “mbjellte kaos”.
Emri i gruas nuk është bërë i ditur. Sipas kryetarit të bashkisë së qytetit, ajo ishte 37 vjeç. Sipas anëtarit të Këshillit të Qytetit të Minneapolis, Jason Chavez, ajo ishte një shtetase amerikane që “qëndronte si roje ” dhe “mbante nën vëzhgim fqinjët e saj emigrantë”.
