Reshjet e dendura të shiut që kanë përfshirë ditët e fundit kanë shkaktuar vërshime në shumë zona të Kosovës, duke shkaktuar përmbytje në shtëpi dhe biznese në zona të ndryshme. Sot situata është më e qetë. Të gjitha ekipet në terren, agjencitë shtetërore, ekipet profesionale të zjarrfikjes dhe shpëtimit dhe institucionet e sigurisë, komunat, shoqata po kryejnë detyrat e tyre.
Ndryshe Instituti Hidrometeorologjik i Kosovës ka publikuar raportin për nivelin e ujit në lumenjtë e Kosovës pas reshjeve të fundit, të cilat shkaktuan vërshime në disa komuna të vendit. Në raportin e IHMK-së bëhet e ditur se nga e hëna në të martën në Kosovë kanë rënë mesatarisht 43 mm reshje për metër katror.
Sasia e reshjeve sipas pellgjeve lumore ka qenë më e larta në Drinin e Bardhë me 76.2 mm, në Ibër 27.8 mm, në Moravën e Binçës 19.9 mm dhe në Lepenc 47.9 mm.
Situata më e vështirë paraqitet në lumenjtë: Drini i Bardhë, Ereniku, Bistrica e Deçanit, Toplluha, Klina, Mirusha, Lumi Drenica dhe Lumi i Istogut. Lumenjtë në lindje dhe jug të vendit, si Ibri, Sitnica, Morava e Binçës, Lepenci dhe Nerodimja, aktualisht kanë ngritje të lehtë të niveleve dhe nuk paraqesin rrezik.
Pas shpalljes së gjendjes emergjente në Komunën e Junikut, ekipet për sanimin e gjendjes janë vazhdimisht në terren, në përpjekje për të zhbllokuar rrugën që shpie drejt fshatrave të thella Jasiq dhe Gjocaj, ku situata paraqitet më e rënduar.
Gjendja aktuale në Komunën e Malishevës, pas reshjeve të fundit, paraqitet stabile dhe e qetë. Sipas të dhënave nga Shtabi Emergjent, edhe nata e kaluar ka qenë e qetë, pa probleme të reja të evidentuara, ndërsa niveli i ujërave ka shënuar rënie dhe situata është drejt stabilizimit të plotë.
Për shkak të turbullirës së lartë në kanalin Ibër–Lepenc, si pasojë e reshjeve të dendura të shiut, Kompania Rajonale e Ujësjellësit “Prishtina” ka njoftuar edhe sot se Impianti i Trajtimit të Ujit në Shkabaj vazhdon të jetë jashtë funksionit dhe se në disa zona priten reduktime të furnizimit me ujë.
Kompania Rajonale e Ujësjellësit “Mitrovica” ka njoftuar më 07.01.2026 se niveli i turbullshmërisë në kanalin Ibër–Lepenc vazhdon të jetë mbi kufijtë e lejuar për trajtim të sigurt të ujit. Për këtë arsye, impiantet për trajtimin e ujit të pijes nuk mund të operojnë. Në njoftim thuhet se furnizimi me ujë të pijes mbetet i ndërprerë, ndërsa uji që eventualisht mund të arrijë në rrjet nuk duhet të përdoret për pije.
Ndërkaq Ministria e Arsimit, Shkencës, Teknologjisë dhe Inovacionit (MAShTI) për shkak të reshjeve të fundit atmosferike dhe kushteve të vështirësuara në disa zona të vendit, ka marrë vendim që fillimi i procesit mësimor të shtyhet deri më 12 janar 2026.
