Policia e Kosovës ka raportuar për disa raste të dhunës në familje dhe vepra të tjera penale në raportin e saj të fundit 24-orësh. Këto raste mbeten shqetësuese, pasi në secilin raport ditor të policisë evidentohen dhjetëra raste të dhunës në familje apo në komunitet.
Sipas raportit policor, më 7 janar 2026, rreth orës 20:00, në Lipjan është raportuar një rast i dhunës në familje, ku një mashkull dyshohet se ka ushtruar dhunë ndaj një femre kosovare. Pas intervistimit të palëve, me vendim të prokurorit, rasti është proceduar në procedurë të rregullt.
Një rast i ngacmimit seksual është raportuar po ashtu në Prishtinë, lidhur me një incident të ndodhur më 7 janar 2026. Pas zhvillimit të hetimeve, më 10 qershor 2025, është arrestuar një mashkull i dyshuar për këtë vepër penale ndaj një femre kosovare. Me vendim të prokurorit, i dyshuari është dërguar në mbajtje.
Ndërkaq, në Fushë Kosovë, më 7 janar 2026, rreth orës 21:18, një mashkull kosovar ka raportuar se ishte sulmuar fizikisht nga një tjetër mashkull kosovar. Viktima ka pranuar trajtim mjekësor, ndërsa i dyshuari është arrestuar dhe, me vendim të prokurorit, është dërguar në mbajtje.
Po atë ditë, rreth orës 15:30, në Gjakovë është arrestuar një mashkull kosovar, i cili dyshohet se ka sulmuar një femër kosovare brenda familjes. Viktima ka pësuar lëndime trupore dhe ka marrë trajtim mjekësor, ndërsa i dyshuari është dërguar në mbajtje.
Një tjetër incident është raportuar në Malishevë, po më 7 janar 2026, rreth orës 15:30, ku dy persona të dyshuar, një mashkull dhe një femër kosovarë, janë arrestuar nën dyshimin se pas një mosmarrëveshjeje kanë sulmuar një mashkull kosovar dhe i kanë dëmtuar dyert e shtëpisë së tij. Me vendim të prokurorit, të dyshuarit janë dërguar në mbajtje.
Policia e Kosovës ka bërë thirrje për raportimin e rasteve të dhunës dhe ka theksuar se trajtimi i tyre mbetet prioritet për ruajtjen e rendit dhe sigurisë publike.
